نشرة إنذارية حمرا على شفشاون وتطوان: الشتا غاتوصل حتى لـ150 ملم والثلوج والرياح قوية غادي تضرب عدد من المدن وها التفاصيل .

مصدر الصورة

عمر المزين – كود///

دارت المديرية العامة للأرصاد الجوية نشرة إنذارية جديدة كتنبّه فيها لاضطرابات جوية قوية غادي تعرفها عدد من أقاليم المملكة ابتداءً من نهار الثلاثاء 03 فبراير 2026. النشرة تضمنت مستوى إنذار أحمر فبعض المناطق، مع توقع أمطار طوفانية، وتساقطات ثلجية فالمناطق المرتفعة، ورياح قوية ممكن توصل لسرعات كبيرة.

وحسب المعطيات الواردة، غادي تعرف أقاليم شفشاون وتطوان أمطار غزيرة بزاف كتراوح ما بين 100 و150 ملم، ابتداءً من الثلاثاء مع 12:00 حتى الأربعاء على 23:00، وهو الشي اللي كيخلّي خطر الفيضانات وارتفاع منسوب الوديان وارد بشكل كبير.

كما نبهات النشرة لمستوى إنذار برتقالي فعدد من المدن اللي غادي تعرف أمطار ما بين 60 و100 ملم، وهي المضيق–الفنيدق، طنجة–أصيلة، وزان، العرائش، فحص–أنجرة، الحسيمة وتاونات، خلال نفس الفترة الزمنية.

وكذلك متوقعة تساقطات ما بين 30 و40 ملم فإقليمي خنيفرة وإفران، وما بين 35 و50 ملم فالقنيطرة وتازة، إضافة إلى تساقطات ثلجية فالمناطق اللي علوّها كيتجاوز 1600 متر بكميات ما بين 10 و30 سنتيم، وغادي تهم صفرو، بولمان، تازة، كرسيف، إفران، ميدلت وبني ملال من الثلاثاء حتى الأربعاء صباحاً.

ومن جهة أخرى، النشرة حذّرات من رياح قوية ممكن توصل سرعتها ما بين 75 و90 كلم فالساعة فعدد كبير من الأقاليم، من بينها بولمان، صفرو، إفران، تنغير، مكناس، جرادة، تازة، ميدلت، المضيق–الفنيدق، طنجة–أصيلة، شفشاون، فحص–أنجرة، وزان، العرائش، القنيطرة، الحسيمة، تاونات، كرسيف، فاس، الحاجب، مكناس، الخميسات، تاوريرت، وجدة، الناظور، الدريوش، بركان، سيدي سليمان، سيدي قاسم وورزازات، وذلك ابتداءً من مساء الثلاثاء حتى ليل الأربعاء.