كشفت مصدر حزبي حضر للجولات التنظيمية اللي دار محمد شوكي، المرشح لخلافة عزيز أخنوش، على رأس حزب التجمع الوطني للأحرار، لـ”كود”، بلي نفس الاتفاقات السابقة لي كانت بين أخنوش والمنسقين الجهويين غايتم الاستمرار فيها.

وأكد ذات المصدر لـ”كود” بلي أغلب القيادات الجهوية والوطنية حضرات فهاد اللقاءات، للي كانت فوقت وجيز وشملت لحد الساعة سبع جهات، مشيرا بلي هاد التفاعل مع المرشح شوكي يؤكد بلي قيادة الحمامة مازالت تتوفر على حظوظ وفيرة للفوز بالانتخابات المقبلة.

وأفاد المصدر نفسه لـ”كود” بلي تقريبا 99 في المائة من القيادات والفاعلين الرئيسيين ف الحزب ف مختلف الجهات حضرو لهاد اللقاءات السبعة لي دار شوكي، وبلي متفائلين بالفوز بالمرتبة الأولى.

وعكس للي كيروجو الاستقلاليين بلي “بركة هو رئيس الحكومة المقبل” بعدما اخنوش مبقاش باغي يترشح وهادشي قبل ما تحسم صنادق الاقتراع شكون فعلا غايجي لول، يقول المصدر الحزبي لـ”كود” بلي العود لي تحكرو يعميك، وأن “الأحرار” خدامين بنفس الاستراتيجية لي كان خدام بها أخنوش، تنظيميا وتواصليا وحتى ف اختيار الوجوه لي غادي يرشح.

وقال المصدر لـ”كود” بلي شوكي قدم عروض فهاد الجهات السبعة، وباقي غايزور جهات اخرى، بحيث هاد العروض ركزات على منهجيتو فقيادة الأحرار فالمرحلة المقبلة، وللي غاتكون وفق نفس المهجية السابقة.

تنظيميا، الأحرار قوي على باقي حلفائه، يوضح المصدر الحزبي لـ”كود”، مشيرا بلي “الماكينة الانتخابية لنساء ورجال الأحرار غادي تصدم بعض الحالمين بتصدر الانتخابات المقبلة”.

وأشار نفس المصدر بلي عقود النجاعة لي وقعها رئيس الحزب عزيز اخنوش مع المنسقين الجهويين، وللي كتعتبر أساس الرؤية والاستعداد الجيد للانتخابات، غايتم العمل بها مع الرئيس الجديد وللي غالبا غايكون محمد شوكي، نظرا لنجاحه في إقناع رموز وقيادات الحزب وطنيا وجهويا بعرضه السياسي والتنظيمي.

بخصوص ما يروج عن رحيل عدد كبير من رموز وأعيان وقيادات الحزب نحو أحزاب أخرى، نفى المصدر نفسه وجود “عملية ترحال سياسي كبيرة”، مشددا بأن التنظيم القوي لا يتأثر برحيل 3 برلمايين نحو أحزاب أخرى.