السينغال حشاوها لينا جوج مرات، خداو الكاس بالكورة واللعب من وسط بلادنا، وبيننونا نية وسادجين وأميين وهرگاوة وضحكوا علينا الصحافة العالمية على واقعة الفوطة، وزادوا وثقوها دابا قانونيا من خلال معاقبة الكاف للصيباري وللجامعة.. واش كاين شي اهانة وإذلال كثر من هذا؟ .

مصدر الصورة

محمد سقراط-كود///

السينغال حشاوها لينا جوج مرات، خداو الكاس بالكورة واللعب من وسط بلادنا، وبيننونا نية وسادجين وأميين وهرگاوة وضحكوا علينا الصحافة العالمية على واقعة الفوطة، وزادوا وثقوها دابا قانونيا من خلال معاقبة الكاف للصيباري على ود الفوطة ولاقتحام الطاقم التقني لغرفة الفار ولسلوك جامعي الكرات المغاربة، واش كاين شي مهانة وإذلال كثر من هذا، وهادشي كامل بسباب الرگراگي لي جاب منتخب نصو معطوب غير حيت مربي عليهم الكبدة، واشتي هادوك الاقصائات ديال الدور الأول وفاش مكناش كنتأهلوا گاع لكاس افريقيا والله الى أهون علينا من هاد ضياع الكاس من وسط بلادنا بغباء، وتعاقبنا من طرف الكاف كثر من السينغال، حنا تعاقبنا جوج مرات، وأصلا لعبنا معاقبين ملي مامشاش الرگراگي من ورا كأس افريقيا لي فات.

جينا الرابعين في كاس العالم شي حاجة عمرنا حلمنا بيها، وفرحنا وتزادت فينا ضلعة داك ليامات، ولكن للأسف هاديك الرابع كتبقى غير تعاويدة ماشي نجمة كتعلقها في التوني او ميدالية تقدر تشوفها شي نهار في متحف المنتخب، النجمة لي بغينا نعلقوا عي ديال كاس افريقيا، وراه حرمنا منها الرگراگي والطاقم التقني كامل بالغباء العاطفي ديالهم، مسار غير مشرف حتى ماتش مكانت فيه الفراجة او المفاجئة او شي ريمونتادا، بحال لي دار المنتخب في الافين وربعة بتونس، واخا توفرات گاع الظروف اغلب الانتصارات كانوا بمجهودات فردية براهيم دياز وبونو والكعبي وصلونا للنهاية، المقابلة لي لعبنا فيها مزيان راه هي لي تعادلنا فيها مع نيجيريا بلا منماركيو حتى بيت طيلة مية وعشرين دقيقية.

دابا نتمناو غير منمشيوش على خطى الجيران ونبداو نحملوا مسؤولية هاد السقطة لأي واحد من غيرنا، نتمنى هاد الحادثة تردنا واقعيين وتخرج الجامعة بشي نقد ذاتي، وتحمل مسؤولية هاد الخسارة ومذلة العقوبات من الفوق، وتحاول توصع حد لمثل هاد السلوكات والانفلاتات لي وقعات، وتقنع جامعي الكرات أن السحور مكاينش وحنا ماشي في القرون الوسطى، وراه الماتش كيتربح بكورة والضغط وسط التيران، ماشي بالحروزة في الفوطات، وشي واحد يفسر لينا كيفاش كانت الهدرة في الاعلام على العقوبات الشديدة لي غادي تاخدها الجامعة السينغالية، وغادي يوقفوا المدرب لسنوات، ويتحرموا من المشاركة في كاس العالم، وشي واخدين على خطى الجيران فاش بغاو يتعاود الماتش مع الكاميرون، قالو غادي يتحيد الكاس للسينغال، في اللخر المغرب لي تعاقب كثر وتبين ان الفوضى لي داروها جامعي الكرات واللعابة على الفوطة كانت ابعادها كبيرة، ومن بعد تصرفوا بكل غباء، راه هاص لي يتحمل مسؤولية هاد الغباء الجماعي والاعتقادي، منبقاوش غير غادين مكيدين للمرة التانية بعد الالف، هذا نهائي ضاع نتمناو الجاي مايضيعش بنفس هاد الغباء والطرنينة.