سيمانا على الفينال الشوهة. لغبينة ولكوشمارات ولفقصة ما بغاتش تطلق مغاربة: كل ليلة كنعيش كوابيس داك الماتش .

هناء ابو علي وسعيد الشاوي كود ///

وشوفي شوفي. داو دايال بصاح وخلاو لينا ديال بلعاني” گالتها بمكر مع ضحكة ما خارجاش من القلب سيدة خدامة فلاگار “كازا پور” البارح الاحد مع لحداش دالصباح. السيدة كانت كتهدر أپيل فيديو مع صاحبتها وكتمشى. طلقات هاد الجملة باش وصلات حدا مجسم كأس افريقيا للامم اللي كاينة فالدخلة ديال الشارع على ليمن. فالوسط كاينة كورة كبيرة. “هاد الشي كيزيد يفقصنا” طلقها احد الركاب ل”كود” وهو كيشوف فالكاس.

سيمانا على اللي وقع فينال كأس افريقيا للامم بين المغرب والسينغال فملعب مولاي عبد الله بالرباط ولمغاربة مازال مفقوصين. مهمومين. مصدومين. بقايا هاد الكان كيزيد يأزمهم “حشومة عليهم كيعذبونا بهاد الشي. خاصهم يحيدوهم من كاع لاكارات. اي حاجة عندها علاقة بالكان خاصها تغبر. واش هادو ما كيفهموش النفسية ديالنا ولا كيفاش” يطلق مستعمل اخر ل”كود” بنبرة منهزمة.
مصدر الصورة
بيان الديوان الملكي نهار لخميس 22 يناير فالعشية اللي شكر فيه شعبو خففات شوية. سيدنا كان شكر “كافة مكونات الأمة التي ساهمت بشكل رائع في النجاح الكبير لهذه التظاهرة المتميزة”. وهنأ “كافة المواطنين عبر مختلف مدن المملكة على الجهود المبذولة، والتعبير عن شكره لكل فرد على مساهمته القيمة في هذا النجاح التاريخي الذي حظي باعتراف وإشادة العالم أجمع”. ووجه عبارات التنويه “إلى ملايين المغاربة، نساء ورجالا وأطفالا، الذين لم يتوانوا، كل بطريقته ودوما بشكل نموذجي، عن دعم منتخبهم الوطني، الذي بات يحتل المرتبة الثامنة في التصنيف العالمي.

هاد المواساة كانت مزيانة بخصوص وقف تصرفات عنصرية لشي مغاربة. لكن الصدمة مع الفقصة مع التذمر مازال كيعيشوه لمغاربة “تصور ما كيدوزش شي نهار بلا ما كنعيش كوابيس هاداك الفينال. كوابيس بالليل وبالنهار هاد الموضوع هيمن على حياتي. ديما كنفكر فيه” يشرح عادل ل”كود”. هاد الموظف الثلاثيني شاف الماتش فالتيران. كلشي مخلط عليه دابا “ما يمكنش دياز يضيع هاداك الپيلانتي. باينة گالوها ليه باش يضيعو. ولكن راه يقدرو يحيدو للسينغال الكاس على داك الشي اللي داروه”. هواجس مخلطة بنظرية المؤامرة ولات عند مغاربة تلاقات بيهم “كود” “حنا ربحنا الكاس ولكن خليناها للسينغال. وبزاف. خلينا لتونس الكاس ف2004 باش تصوت علينا واليوم تاخذو السينغال باش ما ينوضش الصداع”. كيشرح مهدي ل”كود”. اللي كيوضح باللي “حتى العائلات ولات كتواسي ولادها وبناتها. شافت الماتش. شافت الظلم. راه امي كتاصل بي يوميا كتسول في. هي عايشة ففاس وانا فكازا. كنحس بيها خايفة علي بعد هاداك الفينال”.
مصدر الصورة
شي مغاربة مشاو بعيد “اسيدي ما نبقاوش نشاركو فمسابقات ديال الكاف. ما نمشيوش ليهم. حنا لعبو غير كاس العالم”. كيف قال احد الكازاويين ل”كود” وباش تشرح ليه باللي هاد الشي مستحيل وباللي باش تشارك فمسابقات الفيفا خاصك دوز من مسابقات الكاف، كيرد “اسيدي يحطونا مع اوربا. راه تركيا ماشي اوربية وكتشارك معاهم وراه اسرائيل ما عندها حتى شي حدود مع اوربا وحتى هي كتشارك فالمسابقات الاوربية. حتى حنا نشاركو معاهم. ما عندنا ما نديرو بافريقيا. درنا ليهم كان تاريخي وجزاءنا كلشي يولي كيكرهنا ويحيدو لينا الكاس”.

هاد الشاب بحالو بحال عدد من الشباب داخو. تلفو. كود كانت سولات وصال المغاري، أخصائية نفسية، وفسرات هاد الوضعية باللي “الشعب المغربي شعب ديال التماهي والانتماء” وباللي “كلما كان هاد التماهي قوي، كتكون الصدمة أقسى فحالة الخسارة، بحال اللي وقع بعد هزيمة المنتخب الوطني فنهائي كأس إفريقيا.
مصدر الصورة
ووضحات باللي هاد المشاعر ديال الخيبة والإحباط، وهاد الحزن الجماعي كيقرب لحالة حداد”. هاد الحداد مازال قائم. يمكن الاعلان على نتائج التحقيق اللي دايراه الكاف على انسحاب المنتخب السينغالي من الماتش ودخول جمهورهم للتيران، يقدر يكون شكل من اشكال التعويض. فالانتظار. الفقصة والغبينة غادية تبقى مرافقة عدد من لمغاربة والمغربيات