الأرصاد الجوية فنشرة إنذارية: جايا شتا مجهدة وبرد قاصح وثلوج كثيرة فهاذ المناطق .

مصدر الصورة

عمر المزين – كود///

صدرات المديرية العامة للأرصاد الجوية نشرة إنذارية محيّنة بمستوى يقظة ليمونية، كتْحذّر فيها من تقلبات جوية قوية غادي تهم عدد كبير من أقاليم المملكة، وتشمل تساقطات ثلجية مهمة، أمطار غزيرة مصحوبة بالرعد، ورياح قوية، فالفترة ما بين الخميس 22 يناير والسبت 24 يناير 2026.

وحسب النشرة الإنذارية، من المرتقب تسجيل تساقطات ثلجية ابتداءً من علو 1600 متر، بسمك كيتراوح ما بين 15 و30 سم فـ أقاليم تازة، جرسيف، صفرو، بولمان وميدلت، وما بين 10 و15 سم فـإفران وأزيلال، بينما غادي تكون ما بين 5 و10 سم فـالحسيمة، بني ملال، تارودانت، الحوز، تنغير وورزازات، وذلك نهار الخميس 22 يناير 2026 من التاسعة دالصباح حتى الواحدة ديال الزوال.

كما كيتوقع تسجيل أمطار قوية مصحوبة بعواصف رعدية، بكميات ما بين 20 و40 ملم فـ صفرو، بولمان، إفران، تازة، أزيلال، بني ملال، خنيفرة وميدلت، خلال نفس الفترة.

وفنفس السياق، غادي تعرف مجموعة من الأقاليم تساقطات مطرية أقوى كتوصل ما بين 70 و100 ملم، خاصة فـ طنجة، تطوان، العرائش، القنيطرة، شفشاون، الحسيمة، وزان، الفحص أنجرة، تازة، تاونات، صفرو، مولاي يعقوب، مكناس، إفران، خنيفرة، ميدلت، بني ملال وأزيلال، وذلك من فجر الجمعة 23 يناير 2026 حتى ليلة السبت 24 يناير 2026.

النشرة كتْشير حتى لتسجيل هبات رياح قوية بسرعة كتوصل ما بين 75 و90 كيلومتر فالساعة، وغادي تهم بزاف ديال المناطق بحال: القنيطرة، العرائش، طنجة-أصيلة، الفحص أنجرة، المضيق-الفنيدق، تطوان، شفشاون، الحسيمة، تازة، الدريوش، جرسيف، جرادة، تاوريرت، بولمان، صفرو، بركان، وجدة، الناظور، فكيك، ميدلت، فاس، الحاجب، إفران، تنغير، ورزازات، طاطا، تزنيت، سيدي إفني وكلميم، وذلك نهار الخميس 22 يناير 2026 من التاسعة دالصباح حتى الواحدة ديال الزوال.