شكون عندو مصلحة فهاذ الشي.. طلبة صرحو لـ"كود": ملثمين تعداو على مغاربة وموريتانيين وسط كلية الطب فالسنغال والسفير المغربي تيقول بلي متوصل بحتا شكاية .

كود ـ كازا //

حسب روايات متطابقة ديال عدد من الطلبة، وقعات حادثة اعتداء خطيرة فكلية الطب بمدينة دكار فالسنغال، بعدما دخلو شي وحدين مجهولين، قالو بللي كانوا ملثمين، لفضاءات القراية والمراجعة.

كيقولو بعض الطلبة فتصريحاتهم لموقع ’’كود” أن هاد الأشخاص سبو بكلام عنصري، قبل ما تتطور الأمور لاعتداءات جسدية، لي تضرر منها عدد من الطلبة، خصوصًا الموريتانيين، باستعمال المضا، طالبة متدربة قالت بلي قلبها كان غادي يسكت، كون ما السفارة المغربية للي دخلات من بعد ما تاصلو بها.

من بعد هاد الأحداث، تطلب من الطلبة المغاربة والموريتانيين يبقاو فديورهم بشكل مؤقت، وتوجهات ليهم تحذيرات باش يتفاداو بعض المناطق القريبة من الجامعة وبلايص التدريب، حتى تكالما الأوضاع، حتى لحدود دابا، ما صدر حتى بلاغ رسمي من إدارة الكلية ولا من السلطات السنغالية بخصوص تفاصيل اشنو كيوقع فالسنغال.

فالمقابل، كتشهد مواقع التواصل الاجتماعي فالمغرب حملات افتراضية فيها خطاب عنصري، وهو الشي اللي كيرفضوه بزاف ديال الناس، حيث كيأكدو أن هاد الخطابات ما كتمثلش العلاقات التاريخية والإنسانية اللي كاينة بين المغرب والسنغال، ومكتعبرش على مواقف الشعوب، وكيخلّي هاد الوضع يطرح تساؤلات على شكون ممكن يكون عندو مصلحة فالصداع ينوض بين المغرب والسنغال .

من جهتو أكد سفير المغرب فالسنغال باللي السفارة المغربية فداكار ما توصلات حتى بشكايات رسمية من المغاربة اللي تما، إلا شي حالات قليلة، من بينها حادثة واحد القهوة معروفة، اللي بان فيها فيديو كيتعرضو فيها للتشيار بالحجر من طرف شي مواطنين سنغاليين، وكاين حتى ثلاثة ديال الطلبة المغاربة اللي تستفزو وتضربو وهم دايزين حدّا تجمع ديال جمهور المنتخب السنغالي فساحة الجمهورية.

وأوضح الناصري، في تصريح لجريدة هسبريس الإلكترونية، أن الشرطة السنغالية تدخلت، وأن الأوضاع تتجه عموما نحو التهدئة.

هاد التصريح جا من بعد ما تداولو الناس فالفايسبوك والأنترنت فيديوهات كيبانو فيها اعتداءات على قهوة مغربية فداكار، وهاد الشي وقع نهار الأحد، مع ماتش نهائي كأس إفريقيا للأمم “المغرب 2025″ بين المنتخب المغربي والمنتخب السنغالي.

مصدر الصورة