الفلاحة علم وقراية ماشي لوح الزريعة وتسناها تصب.. شراكة وطنية جديدة كتجمع الحكومة وOCP وجامعة محمد السادس باش يطوّرو الفلاحة المغربية .

كود -بن كرير//

وقّعات وزارة الفلاحة والصيد البحري والتنمية القروية والمياه والغابات، ووزارة الاقتصاد والمالية، ومؤسسة OCP، وجامعة محمد السادس متعددة التخصصات التقنية، البارح فبنكرير، اتفاقية شراكة جديدة كتهدف لتطوير الفلاحة فالمغرب ودعمها باش تواجه التحديات المستقبلية.

هاد الشراكة كاتدخل فإطار التوجيهات الملكية السامية واستراتيجية “الجيل الأخضر 2020-2030”، وكتعتمد على البحث العلمي والابتكار وتكوين الكفاءات، على قبل فلاحة دايمة قادرة تتأقلم مع الإكراهات الاقتصادية والاجتماعية والبيئية، وباش تعزز السيادة الغذائية ديال بلادنا.

مصدر الصورة

الاتفاقية كتركّز على بزاف ديال المحاور، من بينها تحسن صحة التربة، وتوالم التسميد مع داكشي لي مزورع، وتقوي الخبرة ديال الفلاحين بمواكبة ميدانية والتكوين الفلاحي، زيد عليها دعم برامج بحال الزرع المباشر، الزراعة الغابوية، إعادة تأهيل القطنيات، والتدبير بالعقل الموارد المائية.

هاد الشراكة غادي تخلي تنسيق حسن بين المؤسسات العمومية والبحثية، وتطوير نماذج جديدة للإرشاد الفلاحي قريبة من الفلاح، ويتدمج الرقمنة ودعم حلول AgriTech المطوّرة فالمغرب، الشي اللي غادي يساهم فبناء فلاحة مغربية تكون أكثر ابتكارا، وأكثر إدماجا، وأكثر استعداد لمواجهة تحديات المستقبل.

الاتفاقية كتنص تاني على تقوية التكوين الفلاحي وربطو بالبحث العلمي، بشراكات مع معاهد ومدارس وطنية كبار بحال معهد الحسن الثاني للزراعة والبيطرة، المدرسة الوطنية للفلاحة بمكناس، المدرسة الوطنية الغابوية للمهندسين، وكلية العلوم الزراعية والبيئية والاجتماعية بجامعة محمد السادس متعددة التخصصات التقنية، باش يتكوّنو أطر وكفاءات قادرة تواكب تطور القطاع الفلاحي وتجاوب مع الحاجيات ديال الميدان.