مكتب المطارات طلق مركز ديال القيادة العملياتية وها التفاصيل (تصاور) .

عمر المزين – كود///

المكتب الوطني للمطارات شغّل مركز القيادة العملياتية للمطار (APOC) فـمطار محمد الخامس الدولي بالدار البيضاء، وهاد الخطوة كتعتبر تطور مهم فطريقة تسيير وتنظيم العمليات فأكبر مطار فالمغرب، وغا تساهم بزاف فتنظيم الحركة وتسهيل السفر، خصوصاً مع كأس إفريقيا للأمم 2025 والتظاهرات الدولية الجاية.

هاد المركز كاين فوسط المطار وكيخدم بحال “العقل المدبّر” لكل ما يتعلق بالعمليات اليومية. كيجمّع فمكان واحد جميع المتدخلين: وزارة الداخلية، البوليس، الجدارمية، الديوانة، شركات الطيران، شركات المناولة الأرضية، فرق الاستغلال، مراقبة الملاحة الجوية، الصيانة، وتكنولوجيا المعلومات، باش يكون التنسيق سريع وفعّال.

مصدر الصورة

مركز القيادة العملياتية، حسب بلاغ للمكتب، خدّام 24 ساعة على 24 و7 أيام فالأسبوع. كيتكلف بتنظيم رحلات الطائرات، تدبير المدارج ومواقف الطائرات، حركة العربات داخل المطار، مراقبة الأمتعة فالدخول والخروج، تنظيم مسارات المسافرين، تقليص الازدحام فمراقبة الجوازات والتفتيش، تسهيل عمليات الإركاب، وحتى تدبير حركة السير ومواقف السيارات، مع تتبع الصيانة والسلامة والأمن.

بالنسبة للمسافرين، هاد المركز غادي يخفف مدة الانتظار، ويخلي التنقل داخل المطار أسهل وأسرع، مع توفير المعلومة فالحين. وبالنسبة لشركات الطيران، كيساعد على تنظيم أفضل للموارد، تقليص التأخيرات، ورفع المردودية ديال الخدمة.

مصدر الصورة

ومع الارتفاع المتواصل فحركة النقل الجوي، اللي كيتجاوز 12% فالسنة، هاد المركز جا فوقتو باش يواجه التحديات الجديدة ويعزز مكانة مطار محمد الخامس كمحور مهم للنقل الجوي وطنياً وإفريقياً ودولياً. وبهذه الخطوة، كيأكد المكتب الوطني للمطارات التزامو بتحديث وتطوير البنيات التحتية، فإطار استراتيجية “مطارات 2030”.

وكتبان أهمية هاد المركز أكثر مع تنظيم كأس إفريقيا للأمم والتظاهرات الكبرى المقبلة، حيث غادي يمكن من استقبال عدد كبير ديال المسافرين فظروف مزيانة، وتنظيم محكم، وتجربة سفر فالمستوى الدولي.