كشف الحسين يوعابد، المسؤول على التواصل فالأرصاد الجوية لـ”كود” باللي الطقس غادي يبقى متقلب مع أجواء غادي تكون ماشي مستقرة فعدد من مناطق المغرب خلال الأيام اللي جاية.

يوعابد كشف باللي المعطيات ديال التوقعات الجوية كتشير باللي المغرب غادي يبقى متأثر خلال هاد السيمانة بحالة من عدم الاستقرار الجوي، خصوصا فالمناطق الشمالية والوسطى، بسبب تواصل تأثير منخفضات جوية أطلسية نشطة، مرفوقة بتدفق كتل هوائية باردة ورطبة فالطبقات العليا، جاية عبر تيار غربي إلى شمالي-غربي.

هاد الوضع، حسب يوعابد لـ”كود”، كيخلّي الأجواء متقلبة ومتغيرة من نهار لنهار، مع تفاوت فحدة الظواهر الجوية حسب المناطق.

منخفضات أطلسية متواصلة وتقلبات فالجو:

المنخفضات الأطلسية اللي كتأثر دابا على البلاد، يشرح المتحدث، كتخلق ظروف ملائمة لتكوّن السحب الممطرة، وكتساهم فعودة الأمطار لعدد من الجهات، خصوصًا الشمال، الوسط، والمناطق الجبلية.

وأضاف باللي هاد الوضع الجوي غادي يستمر، حسب التوقعات، حتى لبداية السيمانة الجاية، قبل ما تميل الأجواء تدريجيا نحو نوع من الاستقرار.

الأربعاء: أمطار متفرقة وبرودة نسبية

نهار الأربعاء، كيبقى المغرب تحت تأثير منخفض جوي أطلسي نشيط، الشي اللي غادي يخلّي الطقس غير مستقر نسبيًا. ومن المرتقب تسجيل شتا فمناطق طنجة، اللوكوس، الريف، سايس، الأطلس المتوسط، وشمال المنطقة الشرقية، مع أمطار متفرقة حتى لهضاب الفوسفاط وأولماس، الأطلس الكبير، والسواحل المتوسطية.

كما كيتوقع تطيح ثلوج خفيفة فوق قمم الأطلس، مع طقس بارد نسبيًا، وإمكانية تكوّن الجليد محليًا، خصوصا فوق الأطلس، الريف، الجنوب الشرقي والهضاب العليا. الرياح بدورها غادي تكون نشطة إلى قوية أحيانًا، خاصة فالسواحل الوسطى والمرتفعات، مع احتمال تسجيل زوابع رملية محلية بالأقاليم الجنوبية.

الخميس: تحسن محدود مع استمرار البرودة

نهار الخميس، كتتجه الأجواء نحو تحسن نسبي محدود، مع طقس غالبًا غائم، غير أن البرودة تبقى حاضرة، خاصة فوق الأطلس والهضاب العليا الشرقية، حيث ممكن يتشكّل الجليد خلال الليل والصباح.

الأمطار غادي تبقى ممكنة ولكن بشكل ضعيف ومتفرق بأقصى الشمال الغربي، الريف، ومحليًا بشمال المنطقة الشرقية، بينما يكون الطقس عابر السحب بشمال الأقاليم الجنوبية. الرياح كتواصل نشاطها النسبي بالسواحل الوسطى ومنطقة طنجة، مع ارتفاع طفيف فدرجات الحرارة مقارنة بالأيام اللي فاتت.

الجمعة: عودة الاضطراب بقوة

ابتداءً من نهار الجمعة، كيرتقب تجدد الاضطراب الجوي مع اقتراب منخفض أطلسي جديد، قوي وفعّال، الشي اللي غادي يرجّع الأجواء غير المستقرة لعدد كبير من المناطق.

الأمطار أو الزخات الرعدية غادي تهم سوس، السواحل والسهول الأطلسية الوسطى، مع أمطار متفرقة بوسط البلاد، ومحليًا حتى بالسهول الشمالية وبعض مناطق الجنوب.

كما يتوقع تساقط الثلوج فوق الأطلس الكبير، ورياح قوية نسبيًا تشمل السواحل الوسطى، الأطلس، وسط البلاد، المنطقة الشرقية، وحتى الأقاليم الجنوبية. درجات الحرارة غادي تعرف ارتفاع فالشمال الغربي وسايس والأطلس المتوسط، مقابل انخفاض أو استقرار نسبي فباقي المناطق.

من السبت حتى الاثنين: طقس مضطرب وبرودة

خلال الفترة الممتدة من السبت إلى الاثنين، غادي يسود طقس مضطرب فالنصف الشمالي من البلاد وشمال الأقاليم الجنوبية، مع أمطار أو زخات رعدية أحيانًا. الأجواء غادي تكون باردة نسبيًا، خصوصًا فوق الأطلس، الجنوب الشرقي والمنطقة الشرقية.

الرياح غادي تبقى قوية نسبيًا فالسواحل والسهول الأطلسية الشمالية والوسطى، الأطلس، الشرق والجنوب الشرقي، مع تساقطات ثلجية فوق مرتفعات الأطلس، الريف وجنوب المنطقة الشرقية، إضافة إلى انخفاض ملحوظ فدرجات الحرارة النهارية.

بداية الأسبوع الموالي: تقلب ثم استقرار

خلال يومي الثلاثاء والأربعاء اللي جايين، كيتواصل الطقس المتقلب والمضطرب فالشمال، مع برودة واضحة فوق المرتفعات، خصوصًا نهار الأربعاء. ابتداءً من يوم الخميس، كتبيّن التوقعات نزوع تدريجي نحو الاستقرار الجوي بصفة عامة، مع تحسن فالأجواء وارتفاع تدريجي أو استقرار فدرجات الحرارة.