فوزي لقجع رجل سنة 2025. غير بكاسكيطة الفوت: معاه ربح المغرب اول مونديال فمسيرتو. ربحنا الشان والمونديال وكاس عريبان وكأس الكونفدرالية مع بركان .

مصدر الصورة

كود كازا ////

فوزي لقجع رئيس الجامعة الملكية لكرة القدم رجل السنة ل2025. يستاحق هاد اللقب من وجهة نظرنا ف”كود”، لعدة اسباب. المغرب، بحالو بحال عدد من الدول، كانت فيه احداث كثيرة. ماشي كلشي زوين طبعا. مجتمع بين باللي حي كيف شفناه مع احتجاجات جيل زيد” قبل ما يتم السطو عليها من قبل اسلاميين وبقايا اليسار وتموت بحالها بحال 20 فبراير. جيل جديد باغي مغرب زوين. مغرب الكرامة والحرية.

جيل بين على مؤهلاتو وحبو لبلادو كيف شفناه فمونديال اقل من 20 سنة فالشيلي. هادا اول منتخب لكرة القدم جاب لينا كاس العالم. هادي البداية مازال فئات عمرية اخرى تجيبو للبلاد.

هاد الانجاز الاهم لحد الان فتاريخ كرة القدم المغربية، فانتظار نربحو الكان هاد المرة فبلادنا، وراه خدمة نقية وحرافية. تربح فهاد الفئة العمرية خاصك تكون وجدتي كاع الظروف. هاد الشي اللي دارت الجامعة الملكية المغربية لكرة القدم زمن لقجع. المدرب وهبي واللعابة يستحقو رجل السنة طبعا لكن لو كان مجهود ذاتي ما عندوش علاقة بمنظومة كاملة، كانو يستحقوها، لكن باش يربح منتخب اقل من 20 عام المونديال ويتأهل منتخب اقل من 17 العام لربع نهاية كأس العالم اللي دارت فقطر ضد البرازيل وفوز منتخب المحليين بكأس افريقيا “الشان” بنيروبي بكينيا ثم فوز المنتخب المغربي لكرة القدم “باء” قبل ايام بكأس العرب بقطر، كلها كتبين التحولات لكبيرة اللي كتعيشها الكرة المغربية.

تحولات بدات وعطات نتائجها مع الرئيس الحالي فوزي لقجع.
المغرب ولى عندو اشعاع عالمي. شفنا نتائج هاد الاشعاع على قطاعات بحال السياحة. العام اللي فات كانو عدد السياح اللي زارو المغرب كثر من دولة بحال مصر.
مع فوزي لقجع ماشي غير المنتخبات اللي محيحين، حتى الاندية. شفنا نهضة بركان ربحات كأس الكونفدرالية بعد فوزها على سيمبا التنزاني فزنزبار.
كانت ومازال خدمة كبيرة لتأهيل الاندية المغربية لدخول عالم الاحتراف. بدات الاندية تتحول لشركات. دخلو رؤوس اموال مغربية فرأس مال هاد الاندية كيف وقع مع نادي الرجاء البيضاوي والمغرب الفاسي. باقي الاندية راه جاية فالطريق.
كاينة خدمة لهيكلة الاندية موجداها ومقاداها الجامعة الملكية المغربية لكرة القدم زمن رئيسها فوزي لقجع.

الخدمة اللي دارها الرئيس الحالي للجامعة بانت حتى فالبينات التحتية. هاد الاستراتيجية لكبيرة ماشي غير لبناء ملاعب فالرباط واعادة تهييء ملاعب اخرى بحال مولاي عبد لله فالرباط ومحمد الخامس فكازا وملاعب فاس وطنجة واكادير هادا جزء من خطة لاعادة عدد كبير من الملاعب.

احترافية الاندية كتمر بملاعب زوينة مهيئة مزيان كيف شفنا فهاد الكان

راه ممكن غير على حقاش ما درناش واستعملناش الكراطة واخا الشتا اللي صبات كثيرة بزاف بزاف مقارنة بفضيحة مونديال الاندية قبل سنوات، بوحدها كافية باش يكون لقجع رجل السنة. فهاد الكان وجد تنظيم احترافي بتيرانات احترافية. تقريبا كثر من 20 عام ما صبات هاد الشتا اللي صبات هاد ليام. شفنا الگازو بقى مزيان بزاف. زربية.

على هاد الشي للي ذكرنا كلشي يستحق لقجع رجل السنة. رجل السنة غير بكاسكيطة الجامعة. راه فنفس الوقت وزير منتدب مكلف بالميزانية فالحكومة. فهادي خدام مزيان. كيبان سياسي كيعرف يوصل المعلومة بسهولة.

هاد الباسيوني بالكورة المسكون بالرغبة فالنجاح بدل عقلية لمغاربة. من مونديال روسيا كان مآمن بمنتخبنا يمشي بعيد. تأجل داك الشي حتى المونديال القطري. اللي كيعرف فوزي لقجع كيعرف باللي المغرب ممكن يربح ويلعب فعالم لكبار. فالكورة كي مجالات اخرى. عندو عقيدة راسخة باللي ممكن نديو كأس العالم ماشي غير فالكورة بل فمجالات اخرى، المشكلة هو ما عندناش لقجع فكاع المجالات. كاينين ولكن قلال. ممكن هادا محفز يخرجو فوزيات اخرى فقطاعات اخرى. علاش اللا يبدا هاد الشي ف2026