أميمة عطية ـ كود كازا ///

جاوب أحمد ابريجة، رئيس فريق مستشاري البام بمجلس جماعة الدار البيضاء، فجلسة دورة أكتوبر لي انعقدات اليوم الأربعاء 7 أكتوبر، ودافع على أحمد مفتاح، مستشار البام، وعلى الحزب ديالو، من بعد النقاش اللي تفجر حول نتائج الانتخابات، وهز دراعو قدام مستشاري الأحرار بالمجلس، وكال إن البام حصل على المرتبة الأولى «بدراعو» وبثقة المواطنين فبرنامجو الانتخابي والمرشحين ديالو.

هاد التدخل جا فوسط جلسة سخونة، بعدما دخلات مكونات الأغلبية فشد وجذب، خصوصا بين الاستقلال والتجمع الوطني للأحرار، والبام على نتائج الانتخابات وصاك طنجة والتزوير لي وقع فأوراق الانتخابات فالمدينة.

وفهاد السياق، دخل محمد غفير، رئيس فريق الأحرار، على الخط، ورفض «المزايدات داخل المجلس»، وكال فتصريحو لـ’’كود” اللي عندو شي حاجة يمشي للقضاء لمواجهة الفساد، مؤكدا أن «المزايدات على فريقو او العمدة نبيلة الرميلي مغاديش اسمح به وأن أهم حاجة هوما قضايا ومشاريع البيضاويين .

ومن جهة أخرى، مصطفى حيكر، رئيس الفريق الاستقلالي، رد على غفير، وشار لانسحاب فريقو من المجلس والتحالف، وكال فكلمتو إنه إلا ما تحترمش التحالف، فالاستقلال غادي «يتخذ موقف واضح»، وزاد كال: «لي ضاراه شي حاجة من الانتخابات يمشي للطبيب يتعالج».

ومن جهة المعارضة، وفي تصريح لـ’’’كود‘‘، أكد عضو الاتحاد الاشتراكي للقوات الشعبية، بمجلس جماعة الدار البيضاء، مروان راشدي على أن الصورة اللي وقعات اليوم فالمجلس «مؤسفة»، خصوصا أنها جات مباشرة من بعد انتخابات 23 شتنبر.

وزاد ضاف راشدي، أن بهاد النموذج «كنعطيو صورة خايبة»، معتبرا أن الأغلبية «بانت اليوم هشة»، وأن أول محطة من بعد الانتخابات بينات هاد الشي.

وكال المتحدث لـ” كود” إن الأهم خاصو يكون هو البيضاويين وملفاتهم، مشيرا إلى أن المعارضة طالبت بعدد كبير من المعطيات، خصوصا فملفات الممتلكات والنظافة، ومازال كيتسناو أجوبة على تدبير لهاد الملفات من المجلس.