كود – الحسيمة//

عاشت مدينة بني بوعياش ومعاها مدينة إمْزورن بـإقليم الحسيمة، ليلة البارح الثلاص، ليلة مساهلاش، بسباب أمطار رعدية طوفانية قوية تسببات ففيضانات وحملات عمرّات بزاف ديال الشوارع والأحياء.

هاد التساقطات اللي نزلات فوقت قصير، خلات الحملات تهبط بقوة من المرتفعات، هاد الما جرا معاه الغيس، التراب، الحجر الكبير، الشي لي تسبب فشلل تام فحركة السير على مستوى الطريق الوطنية رقم 2.

المحاور الطرقية الرئيسية ديال المدينة ولات ويدان ، الشي اللي قطع الطريق وحاصر الساكنة ومستعملي العربات.

أما على مستوى الخسائر المادية، فالمنطقة سجلات أضرار فحي أكادير وحي بوغرمان وحي بوسلامة.

الما ساگ حتى طموبيلات لي كانت مسطاسيونية حدا الديور وفنفس الوقت، هجم الما حتى علا عدد من البيوت والمحلات، لي من بينها مقهى مشهور فحي أكادير .

الوضعية الصعبة خلات بزاف ديال العائلات تعيش لحظات ديال الخوف والرعب، قبل ما تحرك عناصر الوقاية المدنية والسلطات المختصة لعين المكان مني وبداو المجهودات باش يفتحوا المحاور الطرقية المخنوقة ، ويسرعوا فعمليات تأمين حركة السير وحماية المواطنين.

هاد الرعدة لي ضربات سلطات الضو على الوضعية ديال قنوات تصريف مياه الأمطار والبنية التحتية بالمدينة، اللي ما قدراتش تستوعب هاد الكمية الكبيرة ديال الشتا.