كود هناء ابو علي ///

الاجتماع الشهير للمكتب السياسي لحزب التجمع الوطني للاحرار ف25 غشت اللي فات واللي هاجم فيه حزب الاصالة والمعاصرة وتبعو بيان للمكتب السياسي دار حسب ما علمته “كود” باش يوقف ركوب عدد من وجوه لحمامة على التراكتور. من بين هادو حسب ما علمته “كود”، كاين عضو المكتب السياسي ياسين عكاشة. هاد عكاشة عائلة تجمعية من نهار تأسس هاد الحزب. حسب ما علمته “كود” كانت المفاوضات خدامة باش يركب التراكتور وكلشي توقف فاخر دقيقة.

النائبة فمجلس النواب عن دائرة اكادير زينة ادحلي حتى هي كانت رغبة من البام باش يركبوها على التراكتور, كان التفكير تترشح باسم البام فدائرة تيزنيت اللي هي دائرة ديال عائلتها بيشا. التحاقها ما كملش وقدرات تترشح مع الحمامة فاكادير.

كانت محاولات من شي باميين باش يرجعو محمد غياث ولكن اختار يبقى مع الاحرار يحالو بحال محمد شفيق بنكيران. جاه عرض وتردد وبقى فاللخر. من الاسماء اللي كان البام باغي يجيبها كاين هشام ايت منة، عمدة المحمدية وعضو مجلس النواب باسم الحمامة. هادا من لقلال اللي سد الباب فاللول على البام ورفض حتى يهدر على الموضوع, الغريب كان الوحيد اللي عندو موقف مبدئي ورافض ل”الغدر” السياسي. فكلمتو فالحملة الانتخابية بمديونة باش هدر ايت منة باللي “مواقف حزب التجمع الوطني للأحرار تتميز بالوضوح والوفاء” كان كيرد على عرض البام ليه. هدر على الوضوح والوفاء كذلك باش يهاجم بشكل مبطن ناس فالاحرار كانو دايرين رجل فوق التراكتور ورجل فوق لحمامة.

هاد الشي كيعني باللي بيان المكتب السياسي للتجمع الوطني للاحرار الشهير باش قال باللي كيسجل “بقلق شديد أساليب الاستمالة والضغوط التي طالت برلمانيي الحزب ومنتخبيه وقياداته” وكيرفض “نهج ممارسات مشينة، لما تمثله من مساس بالاختيار الديمقراطي ومصداقية العمل السياسي” وباش حمل “جميع الأحزاب مسؤولية صون مصداقية العمل السياسي” كان كيقصد يوقف النزيف اللي بدا.

بعد هاد البيان مشى للبام من التجمع الوطني للاحرار غير اسماء من دوزيام ديڤيزيون بحال عمدة الرباط وشي وحدين معاها وشي منتخبين خراين