كود – وكالات//

دخل جامع فلندن لونكيط، من بعد ما تقدّمات شكاية ضدو بسبب خطب ومقاطع فيديو تنشرات على الإنترنت كيشجعو فيهم الفقها باش الرجال يضربو العيالات.

وحسب صحيفة «ديلي ميل» البريطانية، جامع دار الحديث، نشر على يوتيوب محاضرات ديال ياسين مونيه، اللي هضر فيهم على «الكبائر»، ولي من بينها عصيان الزوج ورفض العلاقة الحميمة.

وفواحد من المقاطع، قال الفقيه، حسب الصحيفة، بلي الزوج يمكن له «يعاقب» مرتو جسدياً، بعدما ينصحها ويهجرها فالفراش، إذا رفضات الاستجابة ليه فالفراش.

وفنفس المحاضرة، وصف مونيه العلاقات المثلية بأنها من «أشر» الأفعال، وقال بلي الشريعة كتفرض الإعدام على الطرفين، كيف ما هضر على طرق تنفيذ هاد العقوبة.

وفمحاضرة أخرى، شكر السعودية حيثاش كتعدم الناس لي متهمين بـ«السحور».

كما نقلات الصحيفة تصريحات لفقيه آخر فالجامع اسمو، أبو سعد محمد العراقي، قال فيها «عيب» مني ولاو العيالات اليوم قادرين يتاصلو بالبوليس إلا تعرضو للضرب من طرف أزواجهم.

الجمعية العلمانية الوطنية البريطانية قدمات شكاية ضد المركز أمام هيئة المؤسسات الخيرية، واعتبرت أن المضامين المنشورة كدير مخاوف مرتبطة بالعنف ضد العيالات والتحريض على الكراهية.