حملة تضليلية.. فيديوهات قديمة بأيت بوكماز كتروج على أنها احتجاج ضد النتائج الانتخابية وخالد تيكوكين: مكاين والو من هاد الشي .
كود ـ أزيلال//
عشرات الفديوات صبحو مبارطاجيين فمواقع التواصل الاجتماعي كيعطيو الانطباع بأن سكان أيت بوكماز خرجات فمسيرة احتجاجية بسبب نتائج الانتخابات، ولكن المعطيات المرتبطة بالفيديو كتقول عكس هاد الشي.
الفيديوات اللي خرجو كيدورو ماشي جداد، وإنما كانو فالحملة الانتخابية الأخيرة، وبالتالي ما عندهومش علاقة بالنتائج الانتخابية اللي تعلنات مؤخرا، ولا بمسيرة احتجاجية خرجات بسبب الانتخابات.
خالد تيكوكين مرشح pjd لي مخداش مقعد برلماني، كيقول فتدوينة فحسابو على فيسبوك، بللي الواقع فمناطق أيت بوكماز مختلف، حيث الناس كاينين فبلاداتهم كيخدمو، وسط انشغالاتهم العادية، ومكاينة حتى مسيرة مرتبطة بنتائج الانتخابات.
هاد المعطى كيطرح سؤال ديال شكون من صالحو ينشر هاد الصور والفيديوهات القديمة فهاد الوقت على أنها أحداث جديدة، خصوصا فوقيتة حساسة بحال فترة ما بعد الانتخابات باش يعطي انطباعات مغلوطة بتوجيه النقاش العمومي بناءً على معلومات غير دقيقة!.
