كود الرباط //

الفترات الزمنية بين نهار التصويت ونهار تعيين رئيس الحكومة فالمغرب كانت كتختلف حسب السياق وحتى الدستور.

وبما أن دستور 2011 ما فرضش شي أجل محدد بالنهار أو بالشهر باش يتم التعيين من بعد نتائج الانتخابات، فالتاريخ السياسي المغربي من أواخر التسعينات لليوم عرف تفاوت واختلاف كبير فهاد الأجل الزمني، على حسب الظروف والتوازنات السياسية ديال كل مرحلة.

في انتخابات 1997، اللي جابت “حكومة التناوب التوافقي”، طولات المدة بزاف، الانتخابات كانت فـ 14 نونبر 1997، ولكن التعيين ديال عبد الرحمن اليوسفي ما كان حتى لـ 4 فبراير 1998، يعني التعيين خدا 83 يوم كاملة ديال الانتظار. من بعد، ف محطتي 2002 و2007، نقصت هاد المدة بشكل متوالي، واستغرق التعيين الملكي (سواء ديال إدريس جطو فـ 9 أكتوبر 2002 أو عباس الفاسي فـ 19 شتنتبر 2007) ما بين 12 و13 يوم فقط بعد نهار الاقتراع.

وملي دخل المغرب عهد دستور 2011، تقلصت المدة فـ التعيين الأول؛ فـ انتخابات 25 نونبر 2011، تعين عبد الإله بنكيران بعد 4 أيام فقط (نهار 29 نونبر). أما فـ انتخابات 2016، فـ التعيين الأول ديال بنكيران أخذ غير 3 أيام (نهار 10 أكتوبر 2016)، ولكن بسبب “البلوكاج” وتوقف المشاورات، تم الإعفاء ديالو وتكليف سعد الدين العثماني فـ 17 مارس 2017، باش يوصل الوقت الإجمالي لـ 161 يوم حتى تتشكل الحكومة كاملة.

وفالمقابل، كانت انتخابات 2021 هي الأسرع فـ تاريخ الدستور الجديد؛ حيث تعين عزيز أخنوش رئيساً للحكومة نهار 10 شتنتبر 2021، يعني غير يومين فقط بعد الاقتراع ديال 8 شتنتبر. هاد المسار التراكمي كيبين بلي التباين فـ الآجال ماشي عيب قانوني، وإنما هو مرونة دستورية كتعطي للمؤسسة الملكية وقتها والتقدير المناسب.
ودبا ف 2026 مع تصدر حزب الاصالة والمعاصرة للانتخابات التشريعية، هذا اليوم الخامس من نهار الاقتراع ومزال متعينش رئيس الحكومة. الدستور معطا حتى شي اجال، ممكن غذا او بعدو او ف الايام الجايا.