كود الرباط//
أعلنت وزارة الصحة والحماية الاجتماعية، فبلاغ ليها، بللي تم رصد جوج بؤر عائلية محدودة لمرض الخناق (الدفتيريا) بجهة سوس ماسة، وبالضبط فعمالة أكادير إداوتنان وإقليم اشتوكة آيت باها، وهادشي دخل فإطار المنظومة الوطنية لليقظة والرصد الوبائي.
حسب المعطيات الرسمية اللي قالت الوزارة، تم تأكيد حالة وحدة بالمختبر، بينما كاينين ثمانية د الحالات خرين ما زال كيتدار عليهم التحري والتأكيد المخبري، ومن بين هاد الحالات تسجلات جوج حالات د الوفاة ط

وأكدات الوزارة بللي المعطيات المتوفرة كاتبين باللي الأطفال اللي تقاصو بهاد المرض إما ما عمرهم لقحو ضد الدفتيريا ولا ما كملوش الجرعات الموصى بيها.
مباشرة بعد ما تم اكتشاف هاد الحالات، تحركت السلطات الصحية وفعلات بروتوكول الاستجابة الوبائية؛ حيث بدات الفرق السريعة التابعة للمجموعة الصحية الترابية سوس-ماسة عمليات التحقيق الوبائي والبحث الميداني على حالات أخرى. كما تم حصر الناس المخالطين وتتبع حالتهم، مع تقديم العلاج الوقائي بالمضادات الحيوية والتلقيح حسب المساطر الصحية المعمول بيها.
للتذكير، «الدفتيريا» أو الخناق هو مرض معدي كينتقل أساساً عن طريق التنفس والرذاذ، وتقدر تكون عندو مضاعفات خطيرة إلى ما تعالجش بكري. وظهور هاد الحالات كيجيو فواحد السياق دولي عرف فسنوات الأخيرة عودة لهاد المرض فعدد د البلدان، بسباب تراجع نسب التلقيح وانتشار الأخبار الزائفة والمعلومات المضللة على اللقاحات.
فهاد الصدد، أكدات وزارة الصحة بلي التلقيح واستكمال جميع الجرعات ديالو هو الوسيلة الوحيدة والأساسية للوقاية من هاد المرض. ووجهات نداء عاجل لجميع الآباء والأمهات وأولياء الأمور باش يقلبو دفاتر التلقيح د أولادهم ويمشيو لأقرب مركز صحي باش يستدركو أي جرعة ناقصة.
كما دعات كل من بانت عليه أعراض مشكوك فيها باش يتوجه فوراً للمؤسسات الصحية للتشخيص والعلاج، ويجنب المخالطة القريبة مع الناس حتى يشوفو الطبيب.

عمر