بما أنه كاين عيالات فقيهات ومثقفات وقاريات دارو دروس حسنية دينية بين يدي الملك، آش فيها الى كانت رئيسة الحكومة مرأة وحضرت الصلاة جنب سيدنا.. المرأة لي قادرة تعطي درس ديني على اعلى مستوى وتبني جامع واهم جامعة دينية في المغرب، راه قادرة تصلي جوج ركعات في الجامع جنب سيدنا وتستمع بنفس الخشوع لي كيكون عند الرجال للخطبة دالامام وهي ساكتة، المرأة لي تقدر تكون طبيبة و وزيرة ومهندسة وتقدر تولي رئيسة حكومة بالنسبة ليا راه خاص يكون عادي تصلي جنب سيدنا في الجامع، الدين حتى هو تطور مابقاش كينتاشر بالغزوات ولاو كيستعملوا اليوتوب ويعيشو بالادسنس، عادي اذن يشمل هاد التطور حتى صلاة المرأة جنب الرجال في الجامع.

وأصلا واش شرط على رئيس الحكومة يكون كيصلي أو كيصوم أو حتى مسلم، مالنا غادي نوليو لبنان كل منصب بديانة ديالو، مكاين حتى حاجة في الدستور كتنص على ضرورة يكون السياسي مسلم، راه كانوا عندنا برلمانيين يهود ومصوتين عليهم المسلمين، وكاين مستشار ملكي يهودي مغربي،

ويقدر يكون رئيس الحكومة من أي دين أو معندوش دين ومهني راسو، على بقات في الصلاة لي عمرها كانت شرط للكفائة او الثقة، هذا نقاش قروسطي ماخاصوش يكون في دولة المؤسسات أصلا.

غير فكرة أن النقاش السياسي يكون حول معضلة واش لمرأة تدخل للجامع مع الرجال أو تبقى عند الباب راه تعطيك فكرة على الضحالة السياسية، عوض يكون النقاش واش صالحة او لا، علاش صوتوا الناس على حزبها أصلا، العيالات وخصوصا في المغرب بينوا عدة مرات أنهم في معارك وساحات عديدة أكثر كفائة ومعقول من بزاف ديال الرجال، طبعا ماشي بالضرورة المنصوري من هاد العيالات، ولكن عموما راه لي يديرو الراجل تديرو لمرة وفي بعض الأحيان بكفائة كثر وحسن اذن عادي تصلي جنب سيدنا او متصليش گاع في حالة أصبحت مرأة رئيسة للحكومة في المغرب.