من بعد مغادرة جماعية لمسؤولين من مجموعة OCP...شكون غادي يجي فبلاصة مصطفى التراب؟ .

مصدر الصورة

عن Africa Intelligence//

فالوقت اللي عدد من المديرين الكبار فعملاق الفوسفاط ocp كيخويو المجموعة، الرئيس المدير العام مصطفى التراب باقي شاد فسياسة التقشف، ومزال كينقص عدد الخدامة و الموضفين ، الشي لي خلا ينوض الصداع على طريقة تدبير وحكامة الشركة وبالتالي يتفتح الباب على سيناريوهات مختلفة لخلافة الرئيس الحالي.

بعدما كانت وفية للمجموعة من عام 2012، مديرة الشؤون القانونية فمجموعة OCP، كنزة المرغاوي، مشات من الشركة فنص شتنبر.، الاستقالة ديالها جات فواحد الظرفية القانونية الحساسة بالنسبة للمجموعة اللي كيسيرها مصطفى التراب.

نهار 14 شتنبر، مجموعة OCP استأنفات قدام القضاء الفيدرالي الأمريكي فالقضية المرتبطة بالرسوم التعويضية المفروضة على الأسمدة الفوسفاطية المغربية اللي كتدخل للسوق الأمريكية.

استقالات متابعة

استقالة كنزة المرغاوي جات من بعد ما مشا أمين حسيم، المدير العام السابق ديال InnovX، وهي الشركة التابعة لمجموعة OCP واللي تأسسات من طرف جامعة محمد السادس متعددة التخصصات، ولسرمتخصصة فالابتكار.

المهندس، اللي عندو دبلوم من المدرسة الوطنية العليا للفنون والمهن، استاقل من المنصب ديالو فأول شتنبر، باش يلتحق بالفرع المغربي ديال شركة الطاقة الفرنسية Nexans، اللي اختارت مؤخرا باش توفر الكابلات لمشروع المحطة الشمسية Noor Atlas.

حتى إلياس الفلالي، المدير المكلف بقيادة الأداء وسط مجموعة OCP، والمعروف بمنصب Value Steering، خوا الشركة فبداية شتنبر، بعدما دوز غير خمسة شهور فهاد المهمة.

وحسب الإعلام المغربي، Le Desk، الأسباب اللي خلاتو ياخذ هاد القرار كانت “شخصية”، أما مصادر من وسط المجموعة كتقول بلي ضغط العمل المرتبط بالأزمة اللي كيدوز منها OCP كان من بين الأسباب اللي خلاتو يمشي.

مجموعة OCP، اللي كتعتامد بشكل كبير على دول الخليج فالتزود بالكبريت، وهو مكوّن أساسي فإنتاج الأسمدة الفوسفاطية، تضررات بشكل مباشر من الحصار اللي عرفو مضيق هرمز، كأثر جانبي للهجمات الأمريكية والإسرائيلية على إيران من فبراير.

تقليص عدد المستخدمين

فالنص الأول من 2026، سجل رقم معاملات مجموعة OCP تراجع بـ7 فالمائة مقارنة مع نفس الوقت من 2025، بعدما كان طلع بـ20.6 فالمائة فالنص الأول من عام 2024.

ومع الربيع، الإدارة بدات تدريجي حبسات أكبر المشاريع ديالها، و لي من بينها المشروع الصناعي الكبير لإنتاج الأسمدة فـمزّيْندا، وفنفس الوقت بدات فإجراءات قوية باش تنقص عدد الخدامة.

شركة Jesa، وهي مشروع مشترك بين مجموعة OCP وشركة الهندسة الأسترالية Worley، كانت من أكثر الفروع لي ضررو من هاد إجراءات التقشف، خصوصاً بسبب الروطار فالأداءات المالية من طرف الشركة الأم المغربية.

وكان عدد العاملين فـJesa فاول 2026 بين 4 آلاف و5 آلاف موظف، ولكن الشركة التابعة لعملاق الفوسفاط، حسب المعطيات لي جات فالتقرير، سمحات فأكثر من ألفين واحد فالأشهر الأخيرة،
وبشكل عام، كانت مجموعة OCP كضم كثر من 17 ألف موظف مع اخر عام 2025.

انتقادات للمجموعة

حسب نفس المصدر المناخ الاجتماعي نقص بزاف وسط عملاق الفوسفاط، اللي الدولة المغربية عندها فيه 95 فالمائة، و الانتقادات كترات على لطريقة تعامل مصطفى التراب مع الأزمة، وهي انتقادات ما كانتش دايما كتلقى ترحيب.

وفوسط هاد الصداع ، تبعدات لرئيسة المديرة العامة السابقة لشركة الاتصالات الملكية Inwi، نادية فاسي الفهري، وتحولات لمجموعة كبيرة ديال المستشارين التابعين لرئيس مجلس الإدارة.

هاد المنصب كيخدمو حتى الرئيس السابق لفرع OCP المخصص لإنتاج الأسمدة Nutricrops، يوسف الباري.

ومن 2024، كانت نادية فاسي الفهري كترأس من جهتها قسم تثمين الصخور الفوسفاطية اللي كتستخرجها المجموعة، والمعروف بـRock Solutions.

وفـ12 مارس، الاجتماع الأخير لمجلس الإدارة كان بين بلي كاين الصداع بين الرئيس المدير العام ديال مجموعة OCP وبعض ممثلي الحكومة.

المدير العام للوكالة الوطنية للتدبير الاستراتيجي لمساهمات الدولة، عبد اللطيف زغنون، وهو المدير السابق لقطب المناجم فمجموعة OCP، كان بالخصوص نبه لاختلالات تنسبات لطريقة الحكامة والتدبير ديال مصطفى التراب.

“شد ليا نقطع ” بيناتهم لك معروفة وسط الأوساط الاقتصادية فالمملكة، عاد كاينة أخبار كترشح عبد اللطيف زغنون فخلافة مصطفى التراب.

ولكن هاد السيناريو باقي ماشي مؤكد، خصوصا أن الرئيس المدير العام ديال مجموعة OCP، اللي غادي يقرب لـ71 عام، واللي شد المنصب من 2006، كيدعم هشام الحبطّي.

هشام الحبطّي، لي عندو 48 عام، واخد دبلوم من المدرسة المتعددة التقنيات الفرنسية، ومن المدرسة الوطنية العليا للقناطر والطرق، وكيترأس من 2020 جامعة محمد السادس متعددة التخصصات، وهي المؤسسة الجامعية اللي كتمولها مجموعة OCP، واللي كيقراو فيها من بين الطلبة أولاد العائلة الملكية، مولاي الحسن وللا خديجة.

هشام واحد من الأسماء المحتملة باش تاخد منصب رئيس ديوان ولي العهد، كما كيتطرح اسمو فالنقاش على مرحلة ما بعد مصطفى التراب داخل عملاق الفوسفاط.

وفنص شتنبر، تم تعين رئيس جامعة محمد السادس متعددة التخصصات بشكل رسمي أمين عام لمجموعة OCP، وكاينة حتى شخصية أخرى بدات كتبان فسيناريوهات تعويض الرئيس المدير العام الحالي.

نهار 12 يناير، التحقت مسيرة الأعمال والكيميائية الفرنسية-المغربية إلهام قدري، اللي تزادت فكازا، بمجلس إدارة مجموعة OCP بصفتها عضوة مستقلة.

إلهام كانت سمحات مؤخرا ، فمنصب الرئيسة المديرة العامة لشركة Syensqo اللي مقرها فبروكسيل، وهي الشركة اللي خرجات ف 2023 من تقسيم المجموعة البلجيكية المتخصصة فالكيمياء Solvay، ومن داك الوقت، ما خداتش إلهام قدري أي مسؤولية تنفيذية جديدة فمجال الأعمال.