دخل عبد الإله بنكيران، الأمين العام لحزب العدالة والتنمية، على الخط اللي رافق العملية الانتخابية فعدد من الدوائر باتصال هاتفي توصلات كود بشريط منو وجه فيه كلام كيقصد فيه وزير الداخلية، وكيطالب فيه بالتدخل باش تضمن احترام إرادة الناخبين.

https://www.facebook.com/share/v/19jSeoW65y/?mibextid=wwXIfr

وقال بنكيران بلي التشاور مع وزير الداخلية والقطاع ديالو بدا، حسب تعبيرو، «بنية حسنة»، واستمر تقريبا حتى لدابا، كيف شار بلي الوزير كان كيتجاوب معاه وكياخذ بعين الاعتبار، «نسبيا على الأقل»، الإشكاليات اللي كان كيثيرها.

ولكن بنكيران قال بلي الأمور تبدلات ملي حاول يتاصل بالوزير بخصوص مني وصف الإشكالات المرتبطة بدائرة سيدي قاسم، كيف وضح أن الوزير ما جاوبوش وخا التلفون كان كيصوني واعتبر أن عدم الرد «مؤشر ماشي مزيان» بالنسبة ليه.

وخاطب بنكيران وزير الداخلية مني قال بلي كيتمنى يتخذ الإجراءات اللازمة باش يكمل المسار الانتخابي حتى الاخير، بنفس الطريقة اللي قال إنها كانت «مشرفة نسبيا»، كيف أكد أن الأمر كيتعلق بانتخابات وماشي بلعبة.

وشدد بنكيران على أن الحزب اللي غادي يتصدر النتائج خاصو، حسب تعبيرو، يتصدرها «عن استحقاق»، وماشي نتيجة تدخلات أو تأثيرات فبعض الدوائر اللي ذكر منها سيدي سليمان، سيدي قاسم وقلعة السراغنة.

وضاف أن المسؤولين كانوا عطاو تطمينات بأن الأمور غادي تكون ديمقراطية وأن إرادة المواطنين غادي تحترم، وحدر من أن «إفساد آمال الناس» ما يمكنش تكون عندو نتائج إيجابية.

وطالب بنكيران وزير الداخلية، إذا وصلاتو هاد الرسالة، بالتدخل وإرجاع المسؤولين على الدوائر اللي فيها الإشكالات لحترام القانون وإرادة الناخبين.

وفالمقابل، قال بنكيران بلي حزبو غادي يحتج ويتابع القضية قانونيا إذا تبين بلي كاين تزوير أو اختلالات، كيف ضاف أن الهدف ماشي هو خلق صورة سلبية على البلاد، وإنما ضمان انتخابات تعكس الإرادة الحقيقية للناخبين.

وأكد بنكيران أن أي حزب سياسي غادي يسعى لتشكيل الحكومة خاصو تكون عندو مشروعية جاية من نتائج انتخابية حقيقية، كيف شدد على أن «النجاح بهاد الطرق» إذا ثبتت، غادي يدفع حزبو الاحتجاج وسلوك المساطر القانونية.