سياسيو اخر الزمان. الشرعي دعمها انطلاقا من قناعاتو وتعرض لسبان الخايب بسباب هاد الموقف وبنت الباشا جازاتو بهاد الهجوم: دعمني وردوني كتنبى مواقفو باش يشوهو صورتي .

كود هند لكلاوي مراكش ///

مصدر الصورة
احمد الشرعي ناشر “الاحداث المغربية” ومالك “ميد راديو” دعا لدعم بنت الباشا فاطمة الزهراء المنصوري فانتخابات لاربعا 23 شتنبر التشريعية. انطلاقا من قناعاتو وتماشيا مع الخط التحريري ل”الاحداث المغربية” قال باللي هو مع الصف الحداثي وغادي يدعم حزب “الاصالة والمعاصرة”.

التبرير ما جاش من فراغ. اسس ليه وقعد ليك كيف كيقولو. كتب الشرعي انو ف”خضم المعطيات السياسية الراهنة، يبرز حزب الأصالة والمعاصرة في نظرنا كأفضل خيار لتجسيد هذا التوجه. ويجد هذا الاختيار سنده في الهوية التأسيسية للحزب: النضال من أجل قيم الحداثة، والاعتزاز بروافد الهوية المغربية وتنوعها، ومناهضة التقوقع الإيديولوجي، والانكباب على معالجة الإشكالات المجتمعية الملحة، والسعي الدؤوب إلى طرح بديل يقود التغيير في وجه التيارات المحافظة”

وزاد باللي “فتح الباب لأول مرة لتولي كفاءة نسائية قيادة الجهاز التنفيذي. وتلك خطوة تتعدى البعد الرمزي الصرف، لتشكل التكريس المستحق للمكانة الطليعية التي تتبوأها المرأة المغربية في دواليب الاقتصاد، والإدارة، والعمل الدبلوماسي، وميادين الفكر والإبداع” واضاف “لهذه الاعتبارات مجتمعة، تعلن مجموعتنا انحيازها إلى المشروع الحداثي التقدمي الذي يحمله حزب الأصالة والمعاصرة. ولا يحمل هذا الاختيار في طياته أي توجيه لسلوك الناخبين، ولا يترجم أي ولاء حزبي ضيق، بل يجسد الانخراط المسؤول والمساندة الواعية لخيار واضح: خيار مغرب يحرص على تحويل عناصر قوته إلى مكتسبات في متناول الجميع، ويجعل الحداثة ممارسة حية في تفاصيل الحياة اليومية، ويزرع في نفوس شبابه بذور الثقة لصناعة المستقبل”ّ.

الشرعي مشى على تقليد كاين فالصحف العالمية فدعم مرشحين كيتاقطو معاهم فقضايا كثيرة.

بعد هاد الموقف الشجاع واخا ما كنتافقش معاه بخصوص وصف “البام” مع بنت الباشا بالحزب الحداثي، تعرض الشرعي ماشي لانتقادات مقبولة، بل للتخوين من قبل امين عام حزب العدالة والتنمية عبد الاله بنكيران وتعرض لهجوم فهاد الاتجاه من قبل الاسلاميين وحتى التيارات اليسارية الراديكالية.

هاجموه واتاهموه بالعمالة لاسرائيل ووووو. طبعا ترهات وكلام تافه. الشرعي مغربي صادق مومن بوطنه وملكه ومخلص لهما. حياتو كلها كرسها لهاد الشي.

المشكلة ماشي فالتيارات الاسلامية والظلامية اللا. المشكلة جات من المنصوري بنت الباشا. الليلة بمدينة بن گرير دارت تجمع باش تقول للباميين راها ما نساتش مدينة اللي اسس البام فؤاد عالي الهمة، عوض ما تهدر على برنامجها وتقنع بيه المواطنين مشات كتهاجم الشرعي للي دعمها. هجوم مبطن ولكن فيه لغدر. قالت بالحرف “هادي البارح ولا يومين. واحد السيد ما تنعرفو ما تيعرفني. ما عمرني تلاقيتو ما عمرني هدرت معاه فالتلفون جا كيدعمني كيف دعمونا فالحزب 2021 مليون و400 الف مغربي ومغربية” واضافت “جا وبغى يردوني انا كنتبنى مواقف واحد السيد اللي ما كنعرفو ما تلاقيت بيه. اللي ما شفتو اللي ما عمرو هدر معايا… باش يشوهو لي صورتي ويشككو فالمواطنة ديالي”.

هاد لكلام كيبين المعدن ديال هاد مدعية الحداثة. سبق وقلنا ف”كود” باللي ما عمر المنصوري بنت الباشا او بنت الصالحين كيف كتقول على راسها، دعمات شي قضية حقوقية كتهم الحريات فالبلاد. لا دعماتها سياسيا ولا دعماتها كمحامية. هي كتقول راها محامية.

دابا السيد دعمك وكلى لعصا على هاد الموقف، عوض تشكريه وتهاجمي اللي سبو واتاهمو بالخيانة، نضتي انتي هاجمتيه. سلوك كيعني بزاف على اللي ما دارت والو فحملة هاد السنة ومعولة على الجوكير فوزي لقجع باش تربح الانتخابات التشريعية وتتعين رئيسة حكومة. هي ديما كتسقط فالامتحانات ماشي غير هاد الامتحان.

ملاحظة
حنا ف”كود” كنضامنو مع الشرعي. كنضامنو مع حقو فالتعبير. ناشر سلاحو الكلمة. ما عندوش سوابق فالدعوات للقتل والارهاب. ما عمرو وظف الا الكلمة. رجل حوار. كيفتح النقاش وكيتقبل الرأي المخالف برحابة صدر. نعم مع حقو فالتعبير على مواقفو. على اراؤو. على افكارو.