قال أمين التهراوي، وزير الصحة والحماية الاجتماعية وعضو المكتب السياسي لحزب التجمع الوطني للأحرار، بلي الحكومة عطات أهمية كبيرة لتعزيز العرض الصحي فجهة بني ملال خنيفرة، وشار بلي القطاع استفد فالولاية الحكومية الحالية من تعبئة مالية وصلات لـ 7 مليار درهم، اللي مكنات من إطلاق وتنفيذ عدد من المشاريع الصحية فمختلف أقاليم الجهة.

وفلقاء تواصلي نظمو الحزب، الاثنين 14 شتنبر، فجماعة بني عياط بإقليم أزيلال، بحضور رئيس الحكومة عزيز أخنوش، ورئيس الحزب محمد شوكي، وعدد من القيادات التجمعية، قال التهراوي بلي من نهار تحمل المسؤولية على راس قطاع الصحة قبل عامين زار جهة بني ملال خنيفرة 5 مرات، ووقف على عدد من الأوراش والمشاريع اللي الغرض منها هو تقوية العرض الصحي.

ومن بين هاد المشاريع، ذكر الوزير ورش المستشفى الجامعي ببني ملال، وافتتاح المركز الاستشفائي الإقليمي بالفقيه بن صالح، اللي كانت الأشغال ديالو واقفة لـ 10 سنين قبل ما تكمل. وقال بلي هاد المشروع كان منتظر من طرف 300 ألف نسمة.

وضاف وزير الصحة والحماية الاجتماعية أن الحكومة عطّات حتى الانطلاقة لكثر من 140 مركز صحي أولي فالجهة، من بعد ما تسالات أشغال إعادة البناء والتأهيل ديالها، خصوصا فالمناطق الجبلية والقروية.

وزاد قال بلي الحكومة خدامة حتى على تقوية شبكة المراكز الصحية للقرب، واعتبر أن هاد المنشآت هي من الركائز الأساسية ديال سياسة “صحة القرب”، بالنظر للدور ديالها فتتبع صحة الأطفال وبرامج التلقيح، ومواكبة العيالات فوقيتة الحمل، الشي اللي كيساهم فتفادي الوفيات وتحسين ظروف الولوج للعلاج.

وشار التهراوي بلي الاستثمارات اللي توجّاهت للقطاع الصحي فالجهة مكنات، حسب المعطيات اللي قدمها، من بناء 7 سبيطارات جديدة وإعادة تأهيل 9 مستشفيات، عاد 140 مركز صحي أولي، يزيدو عليهم 160 مركز آخر.

وأكد الوزير أن هاد الأوراش كتعكس المجهودات المبذولة باش يتقوى العرض الصحي ويتقرّب أكثر من المواطنين.

وبالنسبة لإقليم أزيلال، وضح التهراوي بلي الإقليم استفد بوحدو من ميزانية مخصصة للقطاع الصحي واصلة لمليار درهم، وبين أن مشاريع جديدة غادي تشوف النور، من بينها جوج سبيطارات، عاد المراكز الصحية للقرب.

وحسب الوزير، هاد المشاريع قوات العرض الصحي والاستجابة بشكل مزيان للحاجيات ديال سكان الإقليم، خصوصا فالمناطق القروية والجبلية.

وشدد التهراوي على أن حزب التجمع الوطني للأحرار باغي، من خلال البرنامج الانتخابي ديالو، يكمل إصلاح المنظومة الصحية الوطنية ويضمن الاستمرارية فالأوراش اللي بداتها الحكومة، بهدف تحسين الولوج للعلاج، وتقريب الخدمات الصحية من المواطنين، والرفع من جودة التكفل الصحي فمختلف مناطق المملكة.