لقجع: واش يكون "المنقذ من الضلال" للبام؟؟؟ البام خاصو تيجيفي ماشي التراكتور إذا بغا يجاوب على مغرب السرعتين .

مصدر الصورة

فاطنة لويزا ـ كود//

في البداية غادي نديرو واحد الملاحظة لشي زملاء بلا ما نسميوهوم، نكتافيو بإياك أعني واسمعي يا جارة، حيت عندنا عزاز ..

هاد الزملاء عاودو نفس الفكرة لي كنا طرحناها في مقال سابق حول أنه ما كايناش شي حاجة سميتها خطيئة النشأة فيما يخص البام، غير هوما فهمو فكرتنا خطأ، وهي أننا فاش قلنا إن البام مكانتش عندو خطيئة النشأة، وأن التأسيس ديالو كان ضرورة سياسية في ديك الوقيتة، باش ينجز زوج مهام، وهي تقديم عرض سياسي جديد قوي يمكن يرجع الثقة في المؤسسات، وخصوصا التمثيلية، بعد ما عرفات انتخابات 2007 أكبر نسبة عزوف في تاريخ الانتخابات المغربية، والثاني هو أن هاد العرض السياسي خاص يكون واضح في الموقف من التيارات الإسلاموية لي كانت ديك الوقيتة طالع ليها الجوك، بسبب ضعف اليسار من جهة، ودعم القوى العظمى آنذاك لتيارات الإسلام السياسي لي كتشارك في الانتخابات، وهادشي كان كيمثل في ديك المرحلة خطر على مستقبل البلاد والتعددية والمسار التحديثي لي كيشكل صلب مشروع الملك الجديد آنذاك…

لكن هادا مكيعنيش أن السي فوزي لقجع المهمة ديالو هو يرجع البام للمشروع الأول لي تخلق من أجلو …

صحيح أن المشروع وقعات فيه انحرافات منذ الانطلاقة ديالو، وغلب على الملتحقين به سلوكات انتهازية، وهادشي لي خلا حتى مول المشروع ينزل من التراكتور، ويقوليهوم بطريقة ضمنية: ما صداقتوش..

اليوم المشكل ديال الإسلام السياسي ما بقاش مطروح بنفس الشكل لي كان مطروح به في بداية الألفية، حيت كاين منحى تنازلي ديال تيارات الإسلام السياسي، سوا المسلحة، وسوا الانتخابية، وفي المغرب كانت نتائج انتخابات 2021 عندها دلالات كبيرة، وهي أن البيجيدي لي كيعبر على التيار الإخواني العالمي إيديولوجيا، وماشي تنظيميا باش منظلموهش، تحول عند الناس إلى حزب عادي، بحالو بحال لوخرين، بمعنى أن أي حزب بما فيه حزب اللحايا غير كيوصل للحكومة كينسا كاع داك الشي لي كان كيبشر به..

وبالتالي مبقاتش مهمة البام هي يواجه الإسلام السياسي بالدرجة الأولى، اليوم مغديش يكون مفاجئ مثلا أنه البام والبيجيدي يكونو في حكومة واحدة. ما بعيدة غير تازة، وحتى البيجيدي براسو ما بقاش كيهاجم البام بنفس الحدة لي كان كيهاجم بها في انتخابات 2011 و2016، وحتى الانتقادات ديالو للقجع كنلقاوها لايت مقارنة مع الانتقادات الموجهة لأخنوش مثلا.

المهمة ديال رفع نسبة المشاركة في الانتخابات، حتى هي ما بقاتش مطلوبة بقوة، لأنه منذ انتخابات 2011 لي جات من بعد الدستور الجديد، والنسبة مستقرة في رقم يتجاوز 50 في المية، وهذا رقم ماشي مشجع، ولكن ماشي ثاني خايب، حيت تقريبا هو نفس النسبة لي كاينة في أغلب الدول بما فيها الديموقراطية، وخلينا من الدول لي مزال عايشة في زمن 99 في المية.

المشكل اليوم هو.. واش كاين عرض سياسي، ممكن يجاوب على التحديات لي للأسف مكتبادرش الأحزاب إلى الطرح ديالها، بل كتبادر الدولة من خلال المؤسسة الملكية في الطرح ديالها بجرأة ووضوح مع المواطنين.

وكنقصدو التحديات الاجتماعية أساسا، ولي اختزلها الملك في عبارة دالة وهي.. مغرب السرعتين ..

وهاد مغرب السرعتين كاين أفقيا وعموديا، عموديا من خلال عدد الملايرية لي كيتزاد، وعدد الفقراء لي كيتزاد حتى هو، ولي كيعطينا فوارق طبقية كبيرة، وكيهرس إمكانية نشوء طبقة متوسطة قوية، حيت هاد الطبقة هي صمام الأمان لأي استقرار.

وأفقيا من خلال الفروق الكبيرة بين الجهات، عندنا ثلاثة ديال الجهات ديمارات مزيان ولي هي: جهة الدار البيضاء سطات، وجهة الرباط القنيطرة، وجهة طنجة تطوان الحسيمة، وهاد الجهات كلها عندها شريط ساحلي ومتوسطي، وعندها أكبر مطارات البلاد، وعندها أكبر موانئ البلاد، وعندها شبكة طرق سيارة مهمة، وحتى أحسن التيرانات ديال الكرة كاينة فيها، وعندها ثلاثة أكبر مناطق صناعية (طنجة، القنيطرة، كازا)، فيما عندنا جهات كتنفس شوية بسبب الفلاحة أو السياحة (جهة أكادير ماسة، جهة مراكش آسفي)، فيما الجهات الأخرى غادية بحال السلحفاة (جهة خنيفرة بني ملال، جهة الشرق لي جاي منها لقجع، جهة درعة تافيلالت لي مكرفسة بزااااف، جهة فاس مكناس لي ضاربها تران رغم عمقها التاريخي، جهة كلميم واد نون لي هي بوابة الصحراء، فيما جهتا الصحراء (العيون الساقية الحمراء، والداخلة واد الذهب، منكروش انها تدارت فيها خدمة كبيرة، خصوصا انها فاش رجعات لأرض الوطن، ما كان فيها والو، ولكن غتطرح علينا تحديات سياسية عندها علاقة بالتمهيد لتنزيل مخطط الحكم الذاتي في إطار السيادة المغربية…

شنو الخلاصة ديال هادشي؟… وهي أن حكومة 2027/ 2031 خاصها تخدم على التنزيل الأمثل لمشاريع هي أصلا انطلقات بتصور وإرادة ملكيين..

وهاد المشاريع مرتبطة بتقليص الفوارق الطبقية والمجالية، والتنزيل الوطني الواقعي لمخطط الحكم الذاتي تحت السيادة المغربية، وإكمال الأوراش الكبرى ديال البنيات التحتية لي عندها علاقة بكأس العالم، ولكن كذلك عندها علاقة بربح المغرب لبنية تحتية كبيرة تكون في خدمة السياحة والصناعة والتنمية المستديمة.

وفاش كنرجعو لخطابات لقجع فاش التحق بالبام، كنلقاو السيد في عمق هاد الاستراتيجيات، بمعنى السيد عارف فين خاص يمشي خط الحزب في المرحلة المقبلة…

وحتى النقد الذاتي لي كيقدمو للتجارب الحكومية السابقة، منطلق من هاد الاختلالات لي خاص نواجهوها بصرامة في المرحلة المقبلة.

ولكن المشكل لي عند لقجع، ماشي مرتبط به أساسا، ولكن مرتبط بالحامل الحزبي لي اختارو.

وكنقصدو أن البام لي فشل في تنزيل المشروع لي جا من أجلو في 2007، واش قادر يستوعب المشروع ديال الدولة ديال هاد المرحلة؟

إذا استثنينا لقجع، واش عندو بالفعل قيادات عارفة ومستوعبة المرحلة الجديدة؟

واش ماشي ممكن يكون هاد المكتب السياسي براسو هو عقبة كيما كانت المكاتب السياسية لي خلات ناس كتحترم راسها تمشي بحال الهمة وبيد الله وبنعدي.

واش ممكن ينجح لقجع فأنه يقنع المغاربة بلي البام “تاب” لله.

حيت كاين مفارقة.. الناس باغة لقجع وعزيز عليها، ولكن ما تايقاش في التراكتور، وخصوصا بعد الفضائح ديال أعضاء في قيادات الحزب عندهم متابعات ..

ولذلك البام إذا بغا يديماري مع لقجع مخاصوش تراكتور، خاصو وسيلة نقل عندها موتور كيمشي بسرعة كبيرة، باش منعاودوش ديك اللعيبة ديال …

لقجع زوين ولي دايرين به خايبين …