نهار انتخابات 2026.. واش الحراكة غادي يعاودو سيناريو سبتة؟ الإعلام الإسباني كيرصد دعوات جديدة وبوليس الصبليون غا يدير احتياطاتو .

مصدر الصورة

أميمة عطية – كود كازا ///

كشفت وسائل إعلام إسبانية على أنه نهار 23 شتنبر لي جاي تاريخ مهم، بعدما رصدات دعوات جديدة وسط مجموعات على المنصات الرقمية باش تعاود عملية حريك جماعي فالاتجاه ديال سبتة المحتلة، تزامنا مع موعد الانتخابات بالمغرب.

وحسب المعطيات اللي تكلم عليها الإعلام الإسباني، ما كاين حتى تأكيد رسمي لحد الآن على تنظيم هجرة جماعية جديدة فهاد التاريخ، غير أن بعض التقارير تحدثات على احتمال وقوع تحرك بحال لي كان وقع في يوليوز لي فات، مع توقعات بأنه غايكون بأعداد أقل من داكشي اللي وقع فـ30 يوليوز لي فات .

وشار «أنتينا 3 نوثيسياس» إلى أن 23 شتنبر كيبقى واحد من التواريخ اللي كيتداولها الراغبين فالهجرة، بلا ما تكون لحد الآن معطيات رسمية كتأكد هادشي.

وفي السياق نفسو، كالت صحيفة «إل ناسيونال» إن إدارة الأمن الوطني الإسباني (DSN) كانت حددات نهار 15 و23 شتنبر في التواريخ اللي ممكن تعرف موجة تانية د لحريك لسبتة لمحتلة، بلا ما ذكر طبيعة هاد المعلومات.

واللافت هو أن تاريخ 23 شتنبر كيتزامن مع موعد الانتخابات البرلمانية بالمغرب، اللي غادي تفرز أعضاء مجلس النواب وتفتح الباب أمام تشكيل الحكومة المقبلة، وهو الأمر اللي زاد من أهمية هاد التاريخ فالتغطية الإعلامية الإسبانية.

وبنسبة 15 شتنبر، فكيتزامن مع الموعد ديال نهاية «عملية مرحبا 2026»، اللي انطلقت رسميا فـ10 يونيو لي فات، واللي كتواكب عودة أفراد الجالية المغربية المقيمة بالخارج.

وكتجي هاد المعطيات من بعد أسابيع من أحداث سبتة المحتلة، اللي شهدات محاولات جماعية للوصول إلى المدينة، وخلقات نقاشا واسعا بخصوص الهجرة غير النظامية، إضافة إلى عودة موضوع سبتة ومليلية إلى الواجهة السياسية والنقاش العمومي فالمغرب.