واش “سيري تزوجي” هو الجواب لُي عند بنكيران لكل امرا كتعارضو سياسيا؟ مايسة لـ”كود”: ما جاوبنيش علاش باغي يرجع تاني؟ واعد المغاربة بمشروع إسلامي ما قابلش للتنفيذ.. وكتابي مذكرات سياسية قريب يخرج وهادي تفاصيلو ! .

مصدر الصورة

أميمة عطية – كود كازا///

البوز السياسي مكاين ما حسن منو، خصوصا فاش كيتعلق الأمر باسم الأمين العام لحزب العدالة والتنمية عبد الإله بنكيران، لي تصريحاتو دايرين حالة فالسوشيل ميديا.

هاد المرة بنكيران، وفأحد الخطابات ديالو فالحزب، جبد اسم المدونة والمحللة السياسية مايسة سلامة الناجي من جديد، ولكن ما بقاش النقاش كيدور فالسياسة، بحيث اختار بنكيران يجاوب الناجي بخصوص اعتراضها على كيفاش أنه دبر الحكومة فالعهد ديالو بطريقة فيها دخول فشؤونها الشخصية.

وقال ليها بنكيران: “أنا ما بيني وبينك هضرا، انت راه خاصك تزوجي”، وهو الخطاب لي كيخلي نفس السؤال يتطرح: علاش فينما كتنتاقدو شي صحافية ولا كاتبة رأي ولا ناشطة، كيولي الجواب عندو هو الزواج؟ زعما العيالات بلاصتهم غير الدار والرجال السياسة؟

وفهاد السياق، خرجات مايسة بفيديو جاوبات فيه، ولكن “كود” تاصلات بيها مباشرة، وكالت مايسة سلامة الناجي فتصريح خاص: “أنا وصاحبي تنقولو لبنكيران راك خربتي داك الحزب بتهريجك حتى جرا عليه الملك وانفضو من حولك صقور الحزب العثماني والرميد والرباح والشوباني والحقاوي‘‘.

وزادت كالت مايسة بللًي ماغاداش تنساق ورا محاولاتو الدنيئة لشخصنة الموضوع – وتهريب السؤال لي ما قدرش يجاوب عليه حول زيف مشروعو الإسلامي – لسؤال حول المراة مزوجة ولا مطلقة ولا هجالة ولا مصاحبة ولا بوحدها.

وزادت الناجي فتصريحها، وهي كتنتقد طريقة بنكيران فالتعامل مع النقاش، وكالت: “لي ما فهمتش هو كيفاش هاد الشخص كان شي نهار رئيس حكومة، من غير أنه واعد المغاربة بمشروع إسلامي غير قابل للتنفيذ فبلاد المخزن وفبلاد المغاربة الأحرار يرفضون الوصاية – وواعد المغاربة بإصلاحات اجتماعية وادعى أن مستشاري الملك منعوه من تنفيذها ومع ذلك باغي يرجع يشتغل تحت إمرة هؤلاء المستشارين‘‘.

ومن جهة أخرى، أكدت سلامة ناجي على أن هادشي حول الحزب لزاوية شخصية كانت غادي تخرجو للمعارضة فوقت لي الحزب فاز بأغلبية فـ2016، بسبب التكبر ديالو وعجزو عن التفاوض مع جميع الفرقاء، وكالت “إن بنكيران تسبب فشهور ديال البلوكاج حتى جرا عليه الملك محمد السادس وانفض من حولو كل قياديي الحزب وكل المغاربة”.

وزادت طرحات المحللة السياسية فتصريحها لـ“كود” سؤال على بنكيران، لي كتعتبر أنه كيتهرب منو، وكالت: “بما أنه اعترف أنه ما كانش تيحكم وكان مستضعف، وبما أنه ما قدرش يطبق كلمة من قال الله قال الرسول لي تيتاجر بيها باش يغسل عقول العوام – علاش باغي يرجع؟‘‘.

وشددت الناجي على أن الأمين العام ما قدرش يجاوب على السؤال، فقرر يضرب فشخصها، وهو دليل، حسب تعبيرها، على أنه بعيد كل البعد على رجال الدولة والزعماء حاملي المشاريع الفكرية والنقاشات الراقية.

وبخصوص الكتاب ديالها، سولاتها “كود” على فين وصل، ووضحات مايسة سلامة الناجي أن الكتاب هو عبارة على مذكرات سياسية كتمزج بين تجربتها الشخصية والمهنية وبين الأحداث السياسية والفكرية لي أثرت فيها.

وكالت إنها ركزات من خلال ما عاشت على تحولها الفكري من بنت فبيت والديها، مقبلة على الحياة، إلى شابة متأثرة بالفكر الإسلامي، حتى خروجها من عنق الزجاجة، وعن تطور الأحداث والأفكار لي مهدت لهاد التغيير.

وأكدات ناجي لـ“كود” أنه من المرتقب يبقى الكتاب عندها على الأقل حتى لشهرين للتنقيح، لسبب واحد هو أنها حررات الكتاب بالإنجليزية ولقات صعوبة فالتصحيح.