من المفروض قامة علمية وتنويرية كبيرة بحال الدكتور الفايد خاص يكون عندو برنامج يومي في قناة محمد السادس لأنه مجدد ديني بحال ابن تيمية وبحال مارتن لوثر، باغي يحرر الإسلام من الكهنوت ويخرجو من الجمود .

مصدر الصورة

محمد سقراط-كود///

من المفروض قامة علمية وتنويرية كبيرة بحال الدكتور الفايد خاص يكون عندو برنامج يومي في قناة محمد السادس، وخاص يتحرك بحراسة أمنية مشددة ترافقو فين مامشى، وخاصو تكريم لأنه يمثل عقلاء هاد البلاد، وكيقود حرب تنويرية ضد الكهنوت لي ختاطفوا الإسلام وباغين يحتاكروه ويروجوا لنسختهم منه فقط، ومن المفروض الدولة تسمع وتشوف وتقيد التكفريين والإرهابيين الحاليين والمستقبليين، راه كل مرة كيتلقاو قراب يدوزوا للفعل والتفرگيع، ومرة مرة للأسف كيفلتوا شي وحدين وكيديروا كارثة، بحال جريمة شرطي الرحمة الله يرحمو، إذن شنو كتسنى الحد الآن النيابة العامة لتحريك متابعات ضد المحرضين والداعين لقتل الدكتور الفايد.

هاداك لي كان باغي يقتل نجيب محفوظ وخشى فيه جنوي، فاش سولوه علاش دار هاد الجريمة وواش عمرو قرى لنجيب محفوظ أصلا، طبعا صدق غير مأثر بشيوخ التطرف وعمرو قرى لنجيب محفوظ، راه هادشي لي واقع مع الفايد كولشي كيتاهموا بأنه سب رسول الله، بينما هو قال إن الرسول كان قاري وماشي أمي كما يدعي الكهنوت، وله أسبابه المنطقية لقول ذلك طبعا، واش القراية ولات معيورة طبعا لا، إذن علاش هاد الناس كاعيين وباغين يجاهدوا في فخر الرحامنة وولاد سعيد، لأنه تم شحنهم وتلقينهم من طرف الكهنوت، ولي المغرب باقي للأسف يفتقد للجرأة والصرامة للتعامل معاهم بالطريقة كيف تعاملات معاهم السعودية بلاد رسول الله.

كيف ما السلفيين يعتبرون ابن تيمية من مجددي الإسلام، راه حتى الدكتور الفايد واحد منهم وراه شيخ مجدد، وباغي يخرج الدين من حالة الجمود لي رتابطات بيه لحالة الحركة لي غادي بيها العالم ولي تقدر تضمن استمراره لآلاف السنين وحدة خرى، الفايد كيحارب تحنيط الكهنوت للإسلام وباغي يحرروا منهم، وكأي مجدد عادي يتم محاربته من طرف الكهنوت، راهم حاربوا الأئمة الأربعة من قبله وحاربوا أي مجدد أيا كان، وحنا كمغاربة ديما كان عندنا عقدة نقص دينية اتجاه الشرق، أي واحد جاي من الشرق واخا يكون غير كيسرح المعيز ويقوليهم جوج كلمات بالفصحى يقدسوه، وأخيرا فاش المغرب خرج مجدد ديني من تربة الرحامنة الطاهرة، بغاو يحاربوه ويقتلوه گاع، هاعلاش خاص الدولة تحميه وتشد المتطرفين لي باغين يعدموه في الشارع العام.