“اللي عندها 960 مليون تمشي دير مقاولة وتوفر مناصب شغل.. آش غادي تقبقب فالقبة؟”.. مريم جمال الإدريسي كتاهم “الوردة” بالبيع والشرا فالتزكيات والاتحاد الاشتراكي كيجاوب بإخراجها من الحزب والتلويح بالقضاء.. اشنو واقع ؟ .

مصدر الصورة

أميمة عطية – كود كازا ///

صادق المكتب السياسي ديال الاتحاد الاشتراكي للقوات الشعبية، بالإجماع، على أشغال وقرارات لجان البت فترشيحات وكيلات اللوائح الجهوية للانتخابات التشريعية المقررة يوم 23 شتنبر جاي، معلناً فالمقابل قرارات تنظيمية حاسمة فحق رجاء البقالي الطاهري ومريم جمال الإدريسي.

وحسب بلاغ المكتب السياسي، اللي كتوفر “كود” على نسخة منو، فإن المسطرة الخاصة اللي اعتمدها الحزب فاختيار الترشيحات ما كانتش موضوع أي طعن، من تقديم الترشيحات حتا قرارات لجان الترشيح والتأهيل، وصولاً لقرارات لجان البت المنعقدة نهار 20 غشت

وفهاد السياق، علن المكتب السياسي قبول استقالة ديال رجاء البقالي الطاهري وترتيب الآثار المترتبة عليها.

وزاد علن على تخلي مريم جمال الإدريسي عن انتمائها للحزب، وتهمها بالتنكر لنتائج لجنة البت، واخا قبولها سابقاً بالمسطرة وخضوعها ليها و لمقتضياتها، قبل ما توجه انتقادات للحزب ولأعضاء لجنة البت.

وكال المكتب السياسي فهاد السياق، إن الإدريسي روجت ، “ادعاءات باطلة” كتمس بمصداقية مؤسسات الحزب، معلناً أنه كيحتفظ بحقو في متابعتها قدام القضاء على داكشي لي صدر عليها ولي يقدر اشكل جرائم كيعاقب عليها القانون.

وجا هاد القرار وسط مواقف قوية كانت الإدريسي كتعبر عليها بخصوص لفلوس والتزكيات، و كالت في آخر تدوينة على فايسبوك : “اللي عندها 960 مليون تمشي دير مقاولة وتوفر مناصب شغل.. علاش تدخل تضيع وقتها و5 سنوات باش تترافع من أجل الشغل”، قبل ما تضيف أن “التمييز الإيجابي قاعدة دستورية” وتطرح سؤالاً مباشراً: “اللي باغيا تصرف 900 مليون باش تدخل للقبة، آش غادي تقبقب تما؟”

وبخصوص تداعيات هاد لخلاف، كال المكتب السياسي فنفس لمصدر ، إن ردود الفعل المرتبطة بمداولات لجنتي البت بجهتي الدار البيضاء-سطات وطنجة-تطوان-الحسيمة كانت “معزولة” ومخالفة لمبادئ الحزب ونظامو الأساسي وقانونو الداخلي.

وفالبلاغ نفسو، وجه المكتب السياسي دعوة للمناضلات اللي شاركو فالمنافسة على التزكيات وما حالفهمش الحظ باش يواصلو التعبئة ودعم مرشحات ومرشحي الحزب فهاد الانتخابات لي جايا .