الداخلية بدات كتعلم على المكاتب فين غادي يصوتو الناخبين وفتحات منصة إلكترونية للتصويت بالوكالة للجالية .

مصدر الصورة

كود كازا//

علنات وزارة الداخلية أن السلطات الإدارية المحلية غادي تبدا، ابتداءً من الاثنين 24 غشت 2026، فتسليم الإشعارات الموجهة للناخبات والناخبين، باش تعلمهم بأماكن مكاتب التصويت اللي تابعين ليها بمناسبة الانتخابات التشريعية لانتخاب أعضاء مجلس النواب، المقرر تنظيمها يوم الأربعاء 23 شتنبر 2026،

وحسب بلاغ لوزير الداخلية لي طالعات عليه گود، غادي تبقا عملية تسليم هاد الإشعارات حتى لنهار اللي غا يكون قبل الاقتراع، يعني الثلاثاء 22 شتنبر 2026 مع 6 دالعشية.

الوزارة وضحات أن الغرض من هاد الإشعار هو بالأساس تعلم الناخبة أو الناخب بمكتب التصويت اللي غادي يرمي فيه صوتو، مع تذكيرو امتا غا تبدا وتستلي عملية التصويت.

وفالمقابل، شددات الداخلية على أن الإشعار ماشي ضروري باش يمارس الناخب حقو فالتصويت، حيث البطاقة الوطنية للتعريف كتبقى هي الوثيقة الرسمية الوحيدة اللي خاصها تكون لإثبات هوية الناخب أو الناخبة نهار الاقتراع.

وبالنسبة للناخبات والناخبين المغاربة لي برا المغرب، كينص القانون التنظيمي رقم 27.11 المتعلق بمجلس النواب على حقهم فالتصويت عن طريق الوكالة.

ولهاد الغرض، غادي تفتح المنصة الإلكترونية المخصصة لإنجاز وكالات التصويت ابتداءً من الاثنين 24 غشت 2026، وغادي تبقى مفتوحة حتى 12 دالنهار من الثلاثاء 22 شتنبر 2026.

هاد المنصة غادي تمكن أي ناخبة أو ناخب مغربي مقيم خارج المملكة من أنه يوكّل ناخب آخر باش يصوّت نيابة عليه نهار الاقتراع، بشرط يكون هاد الشخص مسجلا فاللوائح الانتخابية العامة فشي جماعة أو مقاطعة من جماعات ومقاطعات المملكة.

الداخلية قالت بلي المعني بالأمر خاصو يدخل للمنصة الإلكترونية ويختار شي واحد من هاد المواقع
www.elections.ma أو www.listeselectorales.ma

يعني باختصار، الداخلية بدات كتوجد لانتخابات 23 شتنبر 2026، وفي نفس الوقت فتحت للمغاربة المقيمين خارج البلاد إمكانية ممارسة حقهم فالتصويت عن طريق وكالة، وفق الشروط والإجراءات المحددة فالقانون.