أوجار: اللي كيبان غير فالانتخابات ماشي بحال اللي خدام عشر سنين وسط المواطنين .

مصدر الصورة

كود الرباط//

أكد محمد أوجار، عضو المكتب السياسي لحزب التجمع الوطني للأحرار، أن الحزب داخل للمرحلة السياسية المقبلة وهو مسنود بحصيلة خمس سنين ديال العمل الحكومي، وبمسار طويل ديال الحضور والتواصل مع المواطنين، مؤكدا أن الأحرار اختار من الأول منطق الخدمة وتقديم الحساب والوفاء بالالتزامات، بعيد على المزايدات والشعارات اللي كيبانو غير ملي كتقرب الانتخابات.

وقال أوجار، خلال اللقاء التواصلي اللي نظمو الحزب باشتوكة آيت باها، إن المغرب، تحت القيادة الرشيدة لصاحب الجلالة الملك محمد السادس، نصره الله، قدر يرسخ تجربة ديمقراطية متميزة، قائمة على احترام الدستور والمؤسسات والمواعيد الانتخابية، وحتى فوسط أزمات كبيرة وصعيبة دازت منها بلادنا، من سنوات الجفاف وجائحة كورونا، وصولا لتداعيات الحرب فأوكرانيا والتقلبات الاقتصادية الدولية.

ورجع أوجار لانتخابات 2021، اللي عطاو فيها المغاربة الثقة للتجمع الوطني للأحرار، وعلى أساس النتائج ديالها عين جلالة الملك عزيز أخنوش رئيسا للحكومة، طبقا للدستور. وأكد أن الحزب دخل لهاد المسؤولية بتعاقد واضح مع المواطنين، مبني على برنامج والتزامات محددة، واليوم من حق المغاربة يعرفو شنو تحقق وشنو دار الحزب والحكومة خلال هاد خمس سنين.

وشدد عضو المكتب السياسي على أن الأحرار راجع اليوم عند المواطنين باش يقدم الحساب ديالو، وباش يدافع على الحصيلة ديالو “بشرف وكبرياء وتواضع”، لأن الحكومة، رغم الظروف الصعيبة اللي خدامة فيها، قدرت توفي بعدد مهم من الالتزامات اللي تعهدات بها، وفعدد من الأوراش مشات حتى أبعد من الأهداف اللي كانت مسطرة فالبداية.

وأضاف أوجار أن تقييم أي تجربة حكومية خاصو يكون بالمنجزات والأرقام والنتائج اللي كيشوفها المواطن على أرض الواقع، ماشي بالمزايدات السياسية ولا بالشعارات. وأكد أن الاقتصاد الوطني حقق مؤشرات إيجابية، رغم توالي الأزمات والإكراهات، وهو الشي اللي خاص يتحط فالسياق ديالو ملي كيتدار النقاش حول حصيلة الحكومة.

وعلى المستوى الحزبي، أكد أوجار أن التجمع الوطني للأحرار ما عمر العلاقة ديالو مع المواطنين كانت مرتبطة غير بالانتخابات. وقال إن الحزب ختار من سنوات يكون حاضر فالميدان، وسط الناس، عبر المنتخبين والمنسقين والهياكل والتنظيمات ديالو، وعبر الجولات واللقاءات التواصلية اللي وصلات لمختلف جهات وأقاليم المملكة.

وأوضح أن الأحرار دار جولات فمختلف مناطق المغرب، مشى عند المواطنين وسمع ليهم وبنى البرامج ديالو انطلاقا من الأولويات والمشاكل اللي طرحوها، ومن بعد رجع عندهم فنصف الولاية باش يقدم الحصيلة، واليوم كيرجع مرة أخرى باش يسمع ويهيئ العرض السياسي والبرنامجي ديالو للمرحلة المقبلة. لأن السياسة، بالنسبة للأحرار، ماشي موسم كيبدا مع الحملة الانتخابية ويسالي مع الصناديق، ولكن خدمة مستمرة ومسؤولية يومية.

وأكد أوجار أن الانتخابات ماشي غير سباق على المقاعد، ولكن تعاقد سياسي ومسؤولية كبيرة، لأن الصوت ديال كل مواطن ومواطنة كيساهم فاختيار التوجه اللي غادي تمشي فيه البلاد خلال خمس سنين. وهاد الشي، حسب أوجار، كيفرض على الأحزاب أنها تساهم فتقوية الوعي بالمشاركة السياسية، وتخلي المواطن يختار على أساس البرامج والحصيلة والمصداقية.

وأبرز عضو المكتب السياسي أن القوة التنظيمية اللي عند التجمع الوطني للأحرار اليوم ما تبناتش فأسابيع ولا قبل الانتخابات بشهر ولا شهرين، ولكن هي نتيجة عشر سنين كاملة ديال الخدمة والبناء والتواصل والحضور فالميدان. عشر سنين والحزب كيبني الهياكل ديالو، وكيكون الأطر ديالو، وكيقوي التنظيمات ديالو، وكيعطي الفرصة للكفاءات والشباب والنساء، وكيقرب أكثر من المواطنين فمختلف مناطق المغرب.

وأضاف أن الحزب اليوم حاضر على امتداد التراب الوطني، وقوتو ماشي غير فالأسماء، ولكن فالمناضلين والمنتخبين والهياكل والكفاءات ديالو، وفهاد القدرة على يبقى قريب من الناس حتى خارج زمن الانتخابات، مؤكدا أن التجمع الوطني للأحرار، بقيادة محمد شوكي، غادي يواصل نفس المسار بنفس التعبئة والجدية والالتزام.

وخلص أوجار إلى أن طموح الأحرار فالمرحلة المقبلة مشروع وواضح: يواصل الموقع الريادي ديالو فالمشهد السياسي، ويطلب ثقة المغاربة من جديد على أساس ما قدم، وما أنجز، وما يقترحه للمستقبل. لأن الحزب، حسب أوجار، ما كيعولش على حملة ديال أيام باش يبني القوة ديالو، ولكن كيعول على عشر سنين ديال العمل، وخمس سنين ديال تحمل المسؤولية الحكومية، وعلى تنظيم حاضر فالميدان وثقة كتتبنى كل نهار مع المواطنين