الاتحاد الدستوري داخل سخون لانتخابات 2026 فأنفا.. كنزة شرايبي لـ“كود”: اختياري للحزب ماشي ترحال سياسي.. وأنفا هي اللي ختارتني ماشي أنا اللي ختاريتها.. بدلت اللون ولكن الطموح والأهداف ثابتة فخدمة الساكنة .

مصدر الصورة

أميمة عطية – كود كازا ///

علمت “كود” من مصادرها الخاصة أن كنزة شرايبي، رئيسة مجلس مقاطعة سيدي بليوط، قررات تلتحق بحزب الاتحاد الدستوري، وتخوض الانتخابات التشريعية لي جايا في شتنبر 2027 باسم الحزب بدائرة أنفا.

كود اتصلات بكنزة شرايبي، اللي كالت فتصريحات خاصة لـ“كود” إن قرار الترشح فدائرة أنفا ماشي اختيار شخصي
، وإنما جا استجابة لرغبة الساكنة،وزادت وضحات أنه “ماشي أنا اللي ختاريت أنفا ولكن أنفا هي اللي ختارتني”.

ووضحات شرايبي فهاد السياق ، أن هاد الاختيار عندو مجموعة من الأسباب، من بينها أنها بنت منطقة أنفا، تزادت فيها وكبرات وخدمات فيها، مضيفة أن التجربة ديالها فهاد 5 سنين اللي دبرات فيها الشأن المحلي كرئيسة لمقاطعة سيدي بليوط، خلاتها تقرب من الساكنة وتتعرف عن قرب على المشاكل والهموم والانتظارات ديالهم.

وزادت ضافت رئيسة مقاطعة سيدي بليوط وكالت ، إن الترشح جا ، جوابا على طلب عدد من الساكنة اللي عبرو ليها على الرغبة فتمثيلهم، معتبرة أن الاستجابة لهاد الطلب كتدخل فإطار الديمقراطية وتنزيل رغبة المواطن على أرض الواقع، والهدف هو تحقيق هاد المطلب وتمثيل ساكنة أنفا والدفاع على القضايا ديال المنطقة من داخل البرلمان.

وبخصوص سؤال “كود” علاش اختارت الترشح فأنفا بالضبط، أكدت شرايبي أن ارتباطها بالمنطقة قوي، بحكم أنها تزادت وكبرات وخدمات فيها، وزادت عليه التجربة اللي راكماتها فالتدبير المحلي والقرب من الساكنة خلال السنوات الماضية.

ومن جهة أخرى، وبخصوص سؤال “كود” واش الالتحاق بالاتحاد الدستوري كيدخل فإطار الترحال السياسي، كالت شرايبي إن الأمر “ماشي ترحال سياسي”، وإنما تغيير للون السياسي، مؤكدة أن الطموح والنضال والأهداف ديالها ما تبدلوش ودايما كيتاجهو لخدمة مصالح الساكنة.

وشارت لمتحدثة نفسها ، إلى أنها كانت كتشتغل تحت ألوان حزب الأصالة والمعاصرة، اللي عبرات على الاحترام ديالها ليه وللخير اللي دار معها فمشوارها سياسي، ولكن أكدت أن الوقت جا باش تاخد واحد القرار “صعب ولكن مفروض”، وتخوض الانتخابات التشريعية المقبلة مع حزب الاتحاد الدستوري.

ووضحات شرايبي أن اختيارها للاتحاد الدستوري جا حيت كتشوف أن هاد الإطار غادي يمكنها تخدم بارتياح وحرية وبطاقة جديدة، وتكمل المسار ديالها بنفس الطموح والأهداف، مع التركيز على الملفات والقضايا اللي كتهم ساكنة أنفا.

وللإشارة فقط ، فمن المنتظر أن تعقد كنزة شرايبي ندوة صحفية للإعلان بشكل رسمي عن ترشحها باسم حزب الاتحاد الدستوري بدائرة أنفا، باش تستعد الانتخابات التشريعية جايا.