فالويكاند كان لقاء لحزب الاصالة والمعاصرة فسيدي سليمان لدعم مرشح التراكتور فالانتخابات التشريعية الشهر الجاي. واخيرا حضرات منسقة القيادة الثلاثية فاطمة الزهرا المنصوري مع الراس الثانية فهاد القيادة مهدي بنسعيد وداك ديال الشبيبة غير “العبقري” ومرشح الحزب لحسن عواد طبعا لكن النجم اللي كلشي تسناه هو فوزي لقجع الملتحق بالبام.

فالدخلة للبلاصة اللي حتاضنات اللقاء كلشي كان باين. هادو اللي حضرو باميين. ديال حزب الاصالة والمعاصرة. باش دخلات المنصوري صفقو عليها وخدا بنسعيد شي تصفقيات، لكن باش هدرو على اسم فوزي لقجع كان الاستقبال كبير والتصفيقات كثيرة وحماسية.

باين اللي جا لهاد اللقاء جا على قبال فوزي لقجع ماشي على لخراين. كلشي فرحان بيه. هادا كيعطي صورة على وضع الحزب اليوم. هاد القيادة الثلاثية ما صالحة لوالو. بنسعيد بوقاحة استغل اول حضور لفوزي لقجع قبل شهر باش يسوق برويطتو اللي ما صالحة والو. هم هاد الانسان هو البينزس. ما سوقو فالسياسة. هادي غير وسيلة للبيزنس. شوفو غير الشركات المحدودة بزاف اللي كتخدم معاه وكتاخذ المارشيات من نهار وصل لوزارة الشباب والثقافة والاتصال.

المنصوري ما عندها لا الگاباري لا السوفل باش لا دير حملة انتخابية ولا لقاءات لمدة طويلة. خطابها ضعيف. اللي خرجو ليها “جبروت” ضعفها بزاف بزاف.

هادو بجوج راهم اكبر معيق للبام اليوم. اكيد ما حاملينش فوزي لقجع. هاد الاخير عندو شعبية ومحبوب وكلام =بتشديد اللام=. قادر يعطي للتراكتور صورة جديدة ولكن بلا ما يكونو حداه عدد من لكمامر اللي كلها كتستغل ففوزي لقجع باش تسوق راسها.

فوزي لقجع بجيل جديد واسماء جديدة قادر يربح البام الانتخابات. طبعا وصل معطل بزاف. ما بقى والو على الانتخابات. غير هو فالجولات ديال دابا وفالحملة الانتخابية خاصو يكون بوحدو مع المرشحين. امثال المنصوري وبنسعيد يديوها فدوائرهم وصافي. ما يقربوش ليه. راهم غاديين يكونو ما حاملينوش. راهم كيوقفو على شعبيتو لكبيرة.

دابا ما كاين شي سياسي عندو هاد الحضور وهاد القبول. اللي كيعيقو هما هادو اللي معاه. منافسيه ماشي الاحرار ولا الاستقلال بل هادو اللي كيبان ليهم فوزي لقجع فايتهم فالشعبية فالسياسة فالفعالية فالتواصل….