علاش رؤساء الاندية صوتو لزيادة فرق البطولة لـ20 حتى طاحت يعقوب وآسفي؟ واش نزاهة الكورة المغربية هانيا قدام مصالحهم الشخصية؟ .

مصدر الصورة

كود سبور//

كاتعيش كرة القدم المغربية جو مشحون بسبب مقترح زيادة عدد اندية القسم الاول والثاني فالبطولة، اللي تقدمو به مدربين مغاربة وفراقي، ودابا محطوط عند المكتب المديري للجامعة الملكية المغربية لكرة القدم، في انتظار الحسم فيه.

البارح الاثنين بمقر الجامعة الملكية المغربية لكرة القدم، وخلال اجتماع لممثلي اندية القسم الاول والثاني من البطولة الاحترافية، كان انقسام وسط الاندية بين المساند لمقترح رفع عدد اندية البطولة بقسميها الاول والثاني من 16 إلى 20 فرقة، حيث كاينين فراقي باغيين وفراقي رافضين وكاينين اندية اللي امتنعت على التصويت.

وصوت 17 نادي مع مقترح زيادة عدد الاندية إلى 20 فرقة، مقابل 7 اندية رفضت هذا الشي بشكل صريح وهي الرجاء الرياضي والفتح الرياضي وشباب السوالم واتحاد التواركة والنادي المكناسي والوداد الفاسي، والاتحاد الإسلامي الوجدي، وامتنعت ثلاثة أندية على التصويت وهي الجيش الملكي والوداد الرياضي والمغرب الفاسي، ومن بعد هذا التصويت، غادي يترفع هذا المقترح إلى الجامعة الملكية المغربية لكرة القدم، وبالضبط المكتب المديري للحسم فيه سوا بالموافقة عليه او بالرفض.

دابا السؤال علاش هذا الضغط اللي مديور لزيادة عدد الاندية من 16 إلى 20 فرقة مرة واحدة جا فهاد الوقت بالضبط؟ وعلاش ما كانش فالسنوات الماضية؟ واش حيث يعقوب المنصور اللي رئيسهم الوزير مهدي بنسعيد واولمبيك اسفي هما اللي طاحو للقسم الثاني؟ حيث هذا الشي كايخلي القيل والقال على تسييس الكورة وتضارب المصالح بين المسؤولين د الاندية وخلط السياسية بالرياضة خصوصا مع اقتراب الانتخابات التشريعية اللي غادي تكون 23 شتنبر 2026، وارتباط اسماء عدد من الاندية بالأحزاب السياسية ومنها حزب الاصالة والمعاصرة.

هذا المقترح اللي تقدمو به المدربين المشومرين قبل أيام قليلة، وزادو صادقو عليه الاندية البارح الاثنين، راه كايخلق جدل قانونية كبير وكايمس بمصداقية ونزاهة الكورة المغربية، والقاعدة والمنطق كايقول ان قرار بحال هذا إلى خرج لحيز الوجود، خاصو يتطبق على الموسم الجديد بمعنى ان الاندية اللي غادي تنافس فموسم 2027-2026 هي اللي غادي تكون معلومة قبل بداية الموسم بانها ما غاديش يطيح منها حتى فريق للقسم الادنى، وغادي يتزادو عليها جوج فراقي اللي طالعين فالموسم اللي من وراه باش يوصل لعدد لـ20 فرقة فالقسمين بوجوج، ماشي يكون القرار كايهم الموسم الماضي 2025-2026، ويعتق الاندية اللي طاحو رسميا بالكورة ويخليهم يبقاو، راه هذا الشي فيه ضرب بنزاهة الكورة المغربية وشوهة كبيرة لها ولمصداقية اجهزتها سوا العصبة الوطنية لكرم القدم الاحترافية او الجامعة الملكية المغربية لكرة القدم.

راه يعقوب المنصور وأولمبيك اسفي والأندية اللي طاحو معهم الموسم الماضي سوا من القسم الاول للثاني او من الثاني للهواة، صافي راه طاحو وخاصهم يمشيو يلعبو ويجتهدو ويخدمو على ريوسهم إلى بغاو يرجعو يلعبو فالقسم اللي كانو كايلعبو فيه، هما وهادوك المدربين اللي مشومرين وما بقاوش لاقيين فين يخدمو حيث ما قدروش يديرو بلاصتهم فالبطولة فالسنوات الاخيرة مع المدربين التوانسة والبرتغاليين، ولا غادي تولي هادي قاعدة والأندية اللي طاحو فكل موسم يتجمعو وينوضو يقدمو مقترح يطالبو برفع عدد الاندية باش يبقاو فالقسم اللي طاحو منو.

المصيبة فهاد الشي هو ان العصبة الوطني لكرة القدم الاحترافية برئاسة عبد السلام بلقشور عاجزة حتى على تدبير ملفات القسم الأول والثاني من البطولة بـ16 فرقة، وما قدراتش تحل مشاكل وملفات سنوات هادي وهي كاتخبط فيهم، بحال البرمجة ديال 30 دورة، بقات لها غير 38 دورة إلى ولات 20 فرقة، زائد مشاكل التحكيم والشغب، وهادي ملفات مازال ما تلقاو لهم حلول ناجعة وكل موسم كايدوز كايكونو فيه مشاكل وغير الموسم الماضي البطولة المغربية ما كملتش فوقتها قبل انطلاق كاس العالم 2026، وخدات استثناء من الفيفا باش تبقى ملعوبة والمونديال بادي بسبب البرمجة والتوقفات الكثيرة وهذا الشي غير بـ16 فرقة، فما بالك بـ20 فرقة ومازال ما تحدد موعد انطلاق البطولة للموسم الجاي، والتوجه اللي كاين دابا غادي نحو انها ما تبدا حتى لمن بعد الانتخابات التشريعية 23 سبتمبر، وحتى قرعة الماتشات مازال ما داروهاش والمشكل هو انها خاصها تسالي قبل بداية كاس افريقيا 2027 فيونيو الجاي.

دابا المكتب المديري للجامعة الملكية المغربية لكرة القدم برئاسة فوزي لقجع، اما اختبار حقيقي للحفاظ على ماء وجه الكورة المغربية، وكيفما قدر يساهم فالارتقاء بجودة المنتخبات الوطنية والبنية التحتية الرياضية المغربية، دابا هو امام مسؤولية الحفاظ على نزاهة البطولة ومعها الكورة المغربية، اللي ولات طريق بالنسبة لشي رؤساء الاندية باش يخدمو مصالحهم الشخصية وما كاتهمهمش المنافسة الشريفة، وما كاتهمهمش حتى صورة المغرب المقبل على تنطيم مونديال 2030.