إلا بغينا نديرو واحد سيناريو افتراضي فإطار التاريخ البديل و الخيال الجيوسياسي، نفترضو أن المغرب قرر يطلق «المسيرة البيضا» ديريكت لسبتة ومليلية، فشنو غادي يوقع من الدقيقة الأولى حتى للحظة الأخيرة؟

المغرب، فهاد السيناريو ، ما غاديش يعلن على «المسيرة البيضا» على غفلة وبلا مقدمات ،المنطق السياسي كايقول بلي تحرك من هاد النوع خاصو يسبقو شهور ديال الحرب النفسية والدبلوماسية الباردة، الرباط غادي تحرك الملف بجهد دوليا ، خصوصاً فـاللجنة الرابعة ديال الأمم المتحدة الخاصة بتصفية الاستعمار، وغادي يبدا الخطاب الرسمي كيركز على التاريخ والوضع القانوني والسيادة، أما الإعلام غادي يسلط الضو أكثر على الحدود، وعلى الوضع الاستثنائي ديال هاد المدون الأوروبية فوق التراب الإفريقي، ومن بعد فواحد اللحظة رمزية، ممكن يخرج خطاب رسمي يعلن على مسيرة شعبية سلمية، كضغط شعبي وسياسي كبير باش يتحرك ملف عمرو قرون.

ومن تما غادي تبدا الحفلة ، الكيران، طموبيلات، قافلات بشرية، وموجات ديال الناس غادي تتحرك لشمال، الفنيدق، المضيق، تطوان والناظور لي غادي يتحولو لنقاط تجمع كبيرة.

العالم كامل كيشوف مئات الآلاف ديال الناس واقفين قدام السياج، هازين تلفونات و كاميرات وقدامهم الحرس المدني والجيش الإسباني ،الشي لي غادي يخلي مدريد تكون فمشكلة،واش تستعمل السلاح قدام مواطنين عزل وتشوه قدام المنتظم الدولي وتولي قضية حقوقية وسياسية عالمية ،ولا ترجع اللور وتخلي ناس يدخلو لبلادهم.

الاتحاد الأوروبي اكيد غايدير تهديدات اقتصادية وسياسية للمغرب ، مدريد غا دي تبغي تدخل الناتو فالنباش، وخا أن معاهدة واشنطن مكتشملش هاد المدون فالحلف، أما روسيا والصين غادي يلقاوها فرصة ذهبية باش يقليو السم للاتحاد الأوروبي.

المنطق كيقول بلي الحرب بين المغرب وإسبانيا ما غاديش تكون فمصلحة حتى طرف، إسبانيا عضو فالاتحاد الأوروبي والناتو، والمغرب عندو علاقات استراتيجية مع أوروبا ومريكان، وموقعو فجنوب المتوسط كيخلي أي مواجهة عسكرية أزمة إقليمية خطيرة، وزيد عليها أن مضيق جبل طارق واحد من أهم الممرات البحرية فالعالم، وأي صداع عسكري كبير قريب منو غادي يهدد التجارة الدولية والملاحة والطاقة والأمن الأوروبي والإفريقي.

«المسيرة البيضا» ماشي بالضرورة خاصها دخل لقاع سبتة و مليلية باش تحقق نتيجة سياسية وإنما يقدر يخلي الملف اللي كان يتحرك ويتحل قبل ماتوصل كيف ما وقع فالصحرا ،حيث حتى حد ما غادي يبغي يبان قدام الرأي العام ديالو بأنه خسر، داكشي علاش الحل فالاول ممكن يكون انتقالي بحال السيادة المشتركة لمدة محددة، و انتقال تدريجي للصلاحيات للمغرب حتى يرجع المغرب هاد الثغور بطريقة سلمية بلا حجرة بلا جنوية.