العصبة المغربية للدفاع عن حقوق الإنسان : خاص سياسات عمومية كتخدم الشباب ماشي غير شعارات.. وداكشي لي وقع فسبتة سبابو مشاكل اقتصادية-اجتماعية ونفسية .

مصدر الصورة

أميمة عطية – كود كازا ///

دعات العصبة المغربية للدفاع عن حقوق الإنسان، بمناسبة اليوم العالمي للشباب اللي كيتصادف مع 12 غشت من كل عام، باش تعطى الأولوية للتشغيل للشباب، وربط سياسات الاستثمار والتكوين والتشغيل بأهداف واضحة فمجال خلق فرص الشغل، مع مراعاة العدالة المجالية وتكافؤ الفرص.

وحسب بلاغ للعصبة، لي كتوفر “كود” على نسخة منو، فأكدت هاد لخرا، أن تثمين هاد الطاقات كيبقى مرتبط بسياسات عمومية مندمجة كتضمن الحق فتعليم مزيان، وخدمة مزيانة، والحماية الاجتماعية، والمشاركة السياسية والمدنية، والعدالة المجالية وتكافؤ الفرص.

وفيما كيخص روينة لي عرفاتها مدينة سبتة المحتلة، و بني انصار ومحيط مليلية المحتلة، فهاد أواخر يوليوز وبداية غشت 2026، فأكدو الحقوقيون أن هادشي خاصو تقييم حقوقي واجتماعي ومؤسساتي شامل.

وكالت العصبة فنفس لبلاغ ، إن محاولات العبور الجماعي، ديال الشباب والقاصرين ولعيالات ، بينات أن ظاهرة الهجرة غير النظامية ما يمكنش تختازل غير فالبعد الأمني أو الحدودي، وإنما مرتبطة حتا بعوامل اقتصادية واجتماعية ونفسية، وبمستوى الثقة ففرص الاندماج وتحسين شروط العيش داخل الوطن.

وزادت شارت العصبة، إلى أن السرعة اللي تجاوب بها عدد من المواطنين مع الأخبار والشائعات المتداولة حول إمكانية العبور نحو سبتة كتشكل مؤشراً كيستدعي الدراسة والتقييم، بالنظر لاستعداد فئات منهم لتحمل مخاطر جدية مرتبطة بالهجرة غير النظامية.

وختمات العصبة بيانها، واكدت على أن هاد المعطيات خاصها تدفع نحو سياسات عمومية أكثر فعالية فمجالات التعليم والتكوين والتشغيل والحماية الاجتماعية، باش تعطي للشباب فرص حقيقية للاندماج الاقتصادي والاجتماعي وبناء مستقبلهم داخل البلاد.