المغرب خسر فلحريگ الجماعي لسبتة اللي ربحو فالمونديال. صورتنا خايبة وهادي مسؤولية لعرايشي اللي خاصو يتحاكم ومسؤولية بوريطة اللي تخبى ورا "وزير" ومسؤولية لفتيت اللي عطى رواية ما قنعات حد ومسؤولية بيطاس لانو لسان الحكومة ومسؤولية بنسعيد اللي باع لينا الوهم على الشباب وداها فالصفقات مع صاحبو الخالدي .

مصدر الصورة

كود هناء ابو علي ////

اللي متبع الاعلام الاسباني هاد ليام كيحس بالحگرة. كيحس بقيمة المغرب كدولة ومؤسسات طاحت بزاف. كيفاش وصلنا لهاد المستوى. بعد لحريك الجماعي لسبتة ولات صورتنا سلبية بزاف بزاف. خايبة. اعلامهم من الاعلام العمومي =القنوات والاذاعات حتى الاعلام الخاص من كاع التوجهات اليميني منها واليساري مورك على المغرب. دولة ديكتاتورية. ما فيهاش ثقة. ما يمكنش الا تتعامل معاها بالقوة….. هادا ملخص صغير للي كيدور يوميا من “الاولى” حتى السادسة” ودوز على القنوات الجهوية.

المغرب كان بنى صورة زوينة وساهمات مشاركتنا فمونديال مريكان باش هاد الصورة تتحسن بزاف. فعيد العرش اللي كان مناسبة لتسويق اكثر للمغرب، وبعد خطاب سيدنا المشيد بالوضع المزيان للبلاد، وقع اللي وقع. حرگ 72 الف لسبتة غالبيتهم العظمي من المغاربة حسب وزارة الداخلية الصبليونية و40 الف حسب الداخلية المغربية.

وقع زلزال كبير سياسي اجتماعي مع هزة حتى ثقافية عن الصبليون. اعلامهم من الساعات الاولى وهو كيضرب فالمغرب. كيقدمو كشريك غير موثوق. واخا وزيرا الداخلية والخارجية ديالهم اكدو باللي الرباط شريك موثوق اعلامهم واحزابهم كلها كلها قالت العكس وهاجمات الحكومة ووزراءها.

استطلاع للرأي عندهم قال باللي كثر من 67 بالمائة من الصبليون كيقول باللي المغرب ورا هاد الهجرة. رأي ضد الحكومة ديالهم اللي قالت باللي العصابات لعبات دور كبير بعد قرار المحكمة العليا الصبليونية اللي قال باللي اللي وصل عومان ما يمكنش يرجع مباشرة وخاصو مسطرة اخرى.

الحكومة بكاع احزابها والمعارضة باشكالها والاحزاب الجهوية كلها دخلات للموضوع. كلها ومصالحو واهدافو ولكن صورة الدولة المغربية ضربات ومازال كتضرب.

مقابل هاد الهجوم لكبير اللي وصل حتى تتحالف اللي ما عمرهم تحالو: اليسار الراديكالي =بوديموس وسومار= مع اليمين المتطرف بوكس= طالبو، كل واحد من جيهتو، فرسائل حطوها فالكونغريس باش الصبليون تطرد المغرب من تنظيم مونديال 2030. رددو باللي ما يمكنش يدار مونديال مع دولة هاجمات السيادة الصبليونية؟

شوفو فين كنا. قبل كان المغرب تقريبا قريب ياخذ النهاية منهم, دابا ولينا فالاقصاء من المشاركة. بغاو يديروها غير هما والبرتغال. رسالة هاد الاحزاب للبرلمان ماشي ملزمة ولكن فيها هاد التحول لكبير اللي وقع لصورتنا. اللي تبهدلات.

حتى المعارضة اليمينية المحافظة ممثلة ف”الحزب الشعبي” قالت للحكومة باللي ايلى الفيفا عطات الفينال للمغرب، خاص الصبليون تنساحب من التنظيم.

طبعا هادي مزايدة والامور ما كتمش بهاد الشي فتنظيم المونديال ولكن باش تشوفو حجم الضرر ديال صورتنا.

وحنا اش درنا؟
عندنا فيصل لعرايشي وصل للشركة الوطنية للاذاعة والتلفزيون ف1999 ومازل معمر. باش وقع هاد الشي ما هدروش قنواتو عليه. ما مسوق لوالو. هادا خاصو يتحاكم. ما سوق الانجازات بطريقة ذكية. ما دار تغطية لاحداث سبتة وقبلها من احداث بحد ادنى يحتارم لمغاربة. عايش فبرجو العاجي. هادي سنوات وهو كيردد باللي عيى وباغي يمشي ولكن هو لاصق فكرسي بلا ما يدير شي حاجة. استمرارو رسالة واضحة من الدولة. ما باغيينش نبدلو الاعلام العمومي. زوين هاكا. لا رياضة لا سياسة لا ثقافة لا مجتمع. برامجهم فعالم ما كيعكسش اش واقع فمغرب 2026. لعرايشي راه هو الباطرون ديال “دوزيم” اللي غادية للاور حتى هي

عندنا وزارة الداخلية المسؤولة الاولى على اللي وقع فسبتة، تسنات شحال من يوم وخرج ناطق رسمي ما كيعرفو حد حتى الصحافيين اللي من المفروض تكون عندهم علاقة بيه، باش يقدم معطيات ماشي مقنعة. ما شرحش لينا شكون اللي جاب هادوك الشباب ولكبار لباب سبتة باش يحركو. علاش ختارو نهار حفل الولاء وعلى ساعات من خطاب العرش ديال سيدنا، باش يوقع اللي وقع. رئيس الحكومة الاسبق الامين العام لحزب العدالة والتنمية عبد الاله بنكيران دار وصف تاريخي للحريك. كان فحفل الولاء وعاود اش شاف. كلشي داز قدام عينو. مازال كيستنى جواب بحالو بحال الكاتب الطاهر بنجلون: شرحو لينا اش وقع.

لفتيت كان يتحاسب على هاد الشي اللي وقع فسبتة. راه فالجهة الاخرى طالبو باقالة وزيري الداخلية والدفاع. هنا ما كاين حتى شي سياسي هاجم لفتيت. راه المسؤول الاول على اللي وقع. علاش ما كانتش القوات العمومية. علاش داز هاد الشي فالمغرب كولو قدام رجالات السلطة….

كان عليه يستاقل.

عندنا كذلك وزير خارجية اسمو ناصر بوريطة خرج باسم مستعار وزير فالحكومة باش يقدم حتى هو التخربيق. ما قنع حد. لدرجة وكالات عالمية ما نشرات حتى كلمة من كلامو الفارغ. ما قنع حد. هاد الشي راه خطير وكيضرب بلاد وصورتها.
حنا ف”كود” ديما نعتابرو بوريطة وزير صغير. كان خاصو يمشي فحالو. بان صغير فهاد الوقت. ما قنع ما خرج فالاعلام الصبليوني يهدر. واش ما لقينا حتى حد يدافع علينا فاعلامهم؟ راه فضيحة

عندنا كذلك ناطق باسم الحكومة اسمو مصطفى بيطاس. كان كارثي فهاد الولاية الحكومية. ضعيف ومتوتر. حشومة ياخذ هاد المنصب. هادا بلا ما يستاقل راه الحكومة سالات وما يمكنش يرجع فالحكومة المقبلة. بوريطة ولفتيت محتمل يبقاو. غادية تكون شوهة.

عندنا كذلك المهدي بنسعيد وزير الشباب …. اللي كيعني الحراكة بشكل من الاشكال. هادا حاضي غير تنظيم احداث وانشطة وتسويق الوهم للدولة باللي متبع القطاع الشبابي. فتحقيق ل”كود” شفنا كيفاش من نهار جا تقريبا كاينين جوج شركات كتاخد مارشيات كاع القطاعات اللي كيشرف عليها: الشباب والثقافة والتواصل. شركة ابيدزير “افان سين” وشركة “دجيت سيت” ديال زياد الخالدي. مازال غاديين ياخدو مارشيات خراين فقطاعات اخرى حكومية.
بنسعيد طلع ما عارف والو على الشباب. بان مع جيل “زيد” وتأكد اليوم.

ما شفناش شي مسؤول حكومي يخرج يدافع على بلادو بوجهو المكشوف. فين هاداك الوالي المكلف بالهجرة اللي سنوات وهو فمنصبو خالد الزروالي. علاش ما بانش لا فالاعلام الاسباني لا فالاعلام المغربي.

راه بلادنا اللي متضررة. هادو كيهمهم مناصبهم فقط لا غير. خاصهم يتحاسبو