الدار ديال لالة صباح فسبتة ولات ملجأ لـ400 حراݣ وكتوفر داكشي لي مقدراتش توفرو سلطات المدينة (تصاور) .

كود -سبتة //

فحي لوس روساليس فسبتة، ولات الدار ديال سيدة سميتها صباح مركز ديال المساعدة الإنسانية، فكل نهار مع 9 دالصباح كتحل باب دارها وما كتسدوش حتى لـ11 ديال الليل، وكيجيو عندها حتى لـ400 مهاجر باش ياكلو، يبدلو حوايجهم، يغسلو، ولا يقلبو على شي حد من عائلتهم مود، كيف ما كتوفر لهم فين بشارجيو تلفوناتهم والويفي.

الدار ديالها ولات كوزينة، سطوك ديال الحوايج، حمام، وفندق ديال لوليدات، والبنيات، خصوصا مع نقص الخدمات الاجتماعية والسلطات.

صباح، ما خداماش بوحدها، كاينة رباعة ديال العيالات من أحياء لوس روساليس، البرينسيبي ولا رينا، كيطيبو، كيجمعو المساعدات، كيفرقو الحوايج، وكيقلبو على بلايص للناس اللي باقين فالزنقة.

مصدر الصورة

المساعدات كاتجي من السكان، تجار، وحتى أطفال عطاو مصروفهم باش يعاونو، فوق السطح، الرجال ودراري كيغسلو راسهم باستعمال السطولة والبرامل البلاستيكية، أما العيالات كيستعملو الحمامات وسط الدار حفاظا على الخصوصية، وبعض الحراگة، من بعد ما كياكلو ويلبسو، كيبقاو يعاونو المتطوعين.

الصباح كتقول بلي أكثر حاجة ناقصة هي الملابس الداخلية، حتى أنها عطات “السروال الداخلي” ديال راجلها وولادها للمحتاجين. ولكن أكثر حاجة كتشغلها هي حماية القاصرات، فليالي متتالية استقبلات بنات قاصرات وصلو خايفات وكيطلبو العوين، وبعضهم كانو ضحايا لمحاولات اعتداء جنسي أو استغلال.

الدار الصباح ولات حتى نقطة باش العائلات تقلب على ولادها الموضرين، الناس كيجيبو التصاور، وكيتبادلو ميساجات على واتساب واتساب ديال دراري اللي ضاعو، وهي كتحاول تعاون باش يلقاوهم.

مصدر الصورة

صباح كتأكد أن اللي كيديرو السكان خفف بزاف الضغط على المدينة، لكن هاد المهمة خاصها تكون من مسؤولية السلطات، ماشي ديال المتطوعين اللي كيخدمو بإمكانيات محدودة.