حزب برتغالي ماليه غير سامعين بالكورة طالب البرتغال تحيد المغرب من تنظيم مونديال 2030 .

مصدر الصورة

كود سبور//

كايحاولو أعداء المغرب يستغلو أي مشكل أو حدث خايب باش يضرو بمصالح المملكة، وهاذ المرة ناض حزب فالبرتغال كايطالب بإبعاد المغرب من التنظيم المشترك مع إسبانيا والبرتغال لمونديال 2030.

وحسب موقع BRAGATV البرتغالي، فحزب “LIVRE” فالبرتغال راسل رئيس الوزراء البرتغالي ورئيس الاتحاد البرتغالي لكرة القدم، كايطالبهم بإعادة النظر فمشاركة المغرب فتنظيم كاس العالم 2030.

وحسب نفس المصدر فهاد الحزب البرتغالي كايدّعي أن الأحداثي الأخيرة فسبتة وحالة حقوق الإنسان فالمغرب والنزاع ديال الصحرا، تُشكك في الظروف السياسية والأمنية اللازمة لاستمرار التنظيم المشترك للبطولة.

وأكد الحزب البرتغالي أن البرتغال وإسبانيا بوحدهم قادرين على تنظيم المونديال بلا المغرب، وطالب الحكومة البرتغالية بإعلان معارضتها العلنية للشراكة الحالية، واقترح إجراء اتصالات ديبلوماسية مع الحكومة الإسبانية والاتحاد الإسباني لكرة القدم لبحث على حل بديل.

هذا الحزب اللي الاسم ديالو “LIVER” كايقول أن القرار يتجاوز المجال الرياضي، ويتعلق بقضايا السياسة الخارجية والأمن والتعاون بين الدول المنظمة.

طبعا هاذ الشي كايبان أنه ماشي بريء، وأنه كاينة أيادي خفية كاتخدم ضد مصالح المغرب، وهاذ الحزب البرتغالي اليساري ما تحركش من راسو وكاين شي أجندة هي اللي ناضت مخدماه.

ولكن المشكل ديال هاذ الحزب البرتغالي هو والقادة ديالو بانو أغبياء، حيث لا الحكومة البرتغالية ولا الحكومة الإسبانية عندهم سلطة إقصاء شي طرف منظم لمونديال 2030، والاتحاد الدولي لكرة القدم هو الوحيد اللي يقدر يسحب التنظيم من شي دولة، وإضافة لهذا الشي فتدخل أي حكومة فالكورة بهذا المستوى اللي كايطالبو به، غادي يعرض الاتحاد الوطني ديال بلادها لعقوبات من طرف الفيفا وتقدر توصل لتجميد الأنشطة الكروية فهاد البلاد.

والمثير للسخرية واللي ما فراسش هذا الحزب، هو أن البرتغال راه عندها أقل حصة فتنظيم مونديال 2030، وغير 3 التيرانات اللي غادي ينظمو يعني حصيلتهم ثانوية، مقابل 6 التيرانات للمغرب.

ومن غير هذا الشي، راه الحجة ديال هذا الحزب البرتغالي ضعيفة بزاف، واش المغرب هو بوحدو المسؤول على أحداث سبتة؟ طبعا لا ماشي هو المسؤول الوحيد ولكن المسؤولية كاتحملها بشكل اكبر إسبانيا والاتحاد الاوروبي فتعاطيهم مع ملف الهجرة.