روبورتاج. “كود” من محطة كازا فواياجور .. حلم الحريك عند شباب وقاصرين تحول لوهم ملّي بوليس كازا حاصر كاع البيبان ووقف سفر الموت للشمال ديال جيل عاش نهار كامل جاعر وكيقلب على مصير مجهول (التصاور) .

أميمة عطية كود كازا ///

البارح من الصباح حتى طاح الليل، ”كازا فوياجور” ما بقاتش غير محطة كيوقف فيها التران ويطلعو وينزلو منها الناس، ولات محطة ديال جيل باين عليه السخط واليأس، جيل هاز معاه صاكو فوق كتافو، قاصد المجهول، وكيتسنى فتيكي النجاة يوصلو لطنجة، ومن تماك لبلاد الغربة.

وحسب ما عايناتو “كود”، هاد الحلم تحول لصدمة منين طوق البوليس كاع مداخل ومخارج المحطة.

فالبيبان كانو واقفين رجال الأمن كيراقبو الداخل والخارج، والقاصرين اللي ما عندهم حتى سبب واضح للسفر للشمال كانو كيتوقفو للاستفسار، واللي ما امتاثلش للتعليمات كيتخذو معاه الإجراءات اللازمة وكيتعتقل.

مصدر الصورة

كل دقيقة كتدوز، كتوصل وجوه جديدة للمحطة، ووجوه اخرى كترجع بخطوات ثقيلة بعدما ما قدرتش تكمل الطريق، الساحة قدام محطة المسافرين فكازا عمرات، الزحام بحال زحام الصيف، ولكن هاد المرة ماشي سفر ديال عطلة ولا تصياف… هاد المرة سفر نحو المجهول.

“كود” دارت جولة صغيرة حتى فجناب المحطة، وكولشي كان مخبي ولكن عينيهم فاضحينهم، وليدات صغار، لابسين سروال دجين، هازين صيكان صغار فيهم غير شوية ديال الحوايج وقراعي ديال الما.

مصدر الصورة

شي جالس فوق الأرض، شي متكي على الحيط، وشي كيتسنى غير الفرصة باش “يسلت”، ولكن الحضور الأمني كان واضح: البوليس، وسطافيط، والقوات المساعدة، كلشي حاضر باش يوقفو هاد جعرا.

وسط هاد الزحام، كيبان أن بزاف منهم ما بقاتش عندهم الثقة، عياو، فقدو الأمل، وباغين يبدلو الواقع بأي طريقة، ولكن السؤال اللي كيبقى مطروح: شنو اللي وصل هاد الجيل لهاد المرحلة؟ واش البطالة؟ واش الإحساس بالحكرة؟ واش صورة الحياة السهلة اللي كتقدمها السوشيال ميديا وخلات بزاف يشوفو الغربة بحال الحل والمُنقذ الوحيد؟

مصدر الصورة

ومن جهة اخرى، وحسب ما عايناتو “كود”، العائلات جاو مع ولادهم، مفيهم لي كان عارف بالمغامرة وكيحاول يسايرهم، وكاين منهم لي ما كان عارف والو حتى عيطو عليه باش يجي يشوف ولدو من بعد ما توقف في المحذة، خصوصا بعدما تلقاو عند بعضهم بالمايوات ديال العومان وحوايج ديال الغطس، فإشارة للاستعداد لأي محاولة فالشمال بين طنجة والفنيدق وسبتة.

وفهاد السياق، وحسب مصادر أمنية، تم توقيف أزيد من 200 شخص ف هاد النهار، في انتظار الأرقام الرسمية.

مصدر الصورة

اللي وقع اليوم فكازا فوياجور ما كانش غير زحام ديال محطة فالصيف، ولكن كان صورة ديال جيل كيحاول يهرب من واقع كيشوفو مسدود، جيل مقتانع أن صاكو فكتافو، وتران طنجة هو الحل ومعارفش شنو كيتسناه، بالنسبة ليهم هادي آخر ورقة بقات عندهم… حتى ولو كان الثمن مغامرة ما كيعرف حتى واحد كيفاش غادي تسالي.

مصدر الصورة