واضطر شمس الطالبي، انه يمسح فيديوات من انستغرام بان فيهم وهو كايتريني فمراكش ولابس توني ديال السنغال، وقرر يمسحهم بسبب ضغط الجمهور والسبان اللي تعرض له على مواقع التواصل الاجتماعي وكاين اللي طالب بأنه ما يبقاش يتعيط له للمنتخب المغربي.

مصدر الصورة
راه الخطوة اللي دار شمس الطالبي ايجابية، وهي دليل على ان المغربي ما عندوش مشكل مع السنغالي، وهذاك الشي اللي وقع ففينال كاس افريقيا 2025، راه حدو التيران والمحكمة الرياضية الدولية، ومن غير هذا الشي راه البلدين كاتربطهم علاقات تاريخية والشعبين خوت.

ولكن ومن خلال ردود الفعل ديال عدد من المشجعين المغاربة تجاه شمس الطالبي، حيث لبس توني السنغال وغضبهم عليه، كايبان انهم مازال ما تهضمش لهم هذاك الشي اللي وقع فالفينال ديال كاس افريقيا 2025، وكيفاش المنتخب السنغالي خسّر الحفلة وبغا يربح اللقب بطريقة ماشي رياضية وكلها تنوعير وتاحرميات، ملي نساحبو من التيران وشي وحدين من جمهورهم دارو الشغب.

مصدر الصورة
ولكن المغاربة دابا خاصهم يتجاوزو هذا الشي اللي دارو السنغال ففينال كاس افريقيا 2025، ويقتديو بسيدنا اللي اصدر عفو على المشجعين السنغاليين اللي تحكمو بسبب شغبهم ففينال كوب دافريك، وخاصهم يعرفو ان المغرب لاعب كبير ومطلع النيفو، وهذا الشي ديال حقد والكره ما عندوش معاه، والسنغال ماشي كاملين خايبين والى كانت أقلية دارت المشاكل فكاس افريقيا، راه بزاف ديال السنغاليين كايبغيو المغرب وعايشين فيه، وعدد من المغاربة عندهم صحابهم سنغاليين، ومنهم اللاعبين ديال المنتخب المغربي، وراه الاعداء ديال المغرب باغيين العلاقات ديال المغرب والمغاربة تخسر مع الدول والجنسيات الأخرى، وكايتلددو ملي كايشوفو بحال هاد التصرفات ديال وحدين غضبو على لاعب مغربي حيث لبس توني د السنغال وهاد الكره والحقد، وهذا الشي اللي باغيين عديان بلادنا.

مصدر الصورة
راه العكس هو اللي خاصو يكون، والمغاربة خاصهم يزيدو للقدام ويفكرو فاللي جاي وما يبقاش عقلهم واقف ففينال كأس افريقيا 2025، خصوصا وان المؤشرات كاملة فصالح المغرب، بعد قرار لجنة الاستئناف سحب اللقب من السنغال ومنحو للمغرب، باعتبار السنغاليين انسحبو فالفينال وبالتالي خسرو مع المغاربة بنتيجة 3-0، ودابا راه القضية فالطاس، والأمور مطمئنة في انتظار صدور حكم المحكمة الرياضية الدولية.