كتعيش مدينة سبتة موجة جديدة ديال الحريگ، بعدما وصل ليها 1500 حراگ فأيام قليلة، حسب الصحافة الإسبانية لي كتشوف أن الوضع ولى صعيب بزاف، خصوصاً مع المحاولات اليومية ديال الحريگ من البحر.

وكيعولو بزاف ديال الحراكة على العومان باش يدخلو لسبتة من جهة تاراخال، ويتفاداو الگرياج الحدودي،هاد الحراكة من بينهم مغاربة ومهاجرين من دول إفريقيا جنوب الصحراء، وحتى جزائريين، كيغامرو بمسافة بحرية ديال 5 سوايع وخا أن عدد كبير منهم ما كيعرفش يعوم مزيان.

السبب الرئيسي ديال هاد الموجة هو حكم خارج من المحكمة العليا الإسبانية نهار 29 يونيو، اللي اعتبر أن أي واحد وصل لإسبانيا عومان ما يمكنش يتريفولا ديك ساعات للمغرب، لأنه ما فات حتى حاجز حدودي كما كيوقع مع اللي كينقزو فوق الگرياج ،هاد القرار كيخلي السلطات مضطرة تدخل فمسطرة استقبال وإجراءات قانونية عادية.

وكيقول التقرير بلي هاد الحكم انتاشر دغيا فالجانب المغربي، وخلق انطباع بأن دخول إسبانيا وبلدان الاتحاد الأوروبي ولى ساهل، الشي لي شجع عدد كبيبر من الناس على محاولة العبور، وبالتالي عمرات مراكز إيواء المهاجرين وحتى انتشرت مخيمات عشوائية فشوارع المدينة.

هاد الحكم كيف ما تابعاتو ݣود ،جا بسباب واحد المهاجر جزائري كان وصل لسبتة عومان فـ 14 نونبر 2024، غير شدوه، عطاوه الصليب الأحمر الإسعافات الأولية، ومن بعد السلطات الإسبانية رجعاتو ديك الساعات للمغرب (بلا ما تقيد سميتو، وبلا ما تخليه يشوف محامي أو يطلب اللجوء). هاد الحراگ، بمساعدة جمعيات حقوقية، دار دعوى قضائية حيت اعتبر باللي تظلم وتخرقات الحقوق ديالو، القضية دازت من شحال من محكمة، تال المحكمة العليا الإسبانية اللي عطاتو مؤخرا الحق وقالت باللي كيطبق “الترحيل الساخن” غير على اللي كينقزو السياج المادي (الگرياج)، ماشي اللي جايين عومان، وهادشي اللي قلب كاع القوانين ديال الهجرة فإسبانيا.

وفالمقابل، حذرات الجمعية الموحدة للحرس المدني الإسباني من ارتفاع عدد الوفيات بسبب هاد المحاولات الخطيرة، ووفق الأرقام اللي قدماتها، تلقاو 8 جثث غير فشهر يوليو ، اما العدد الكلي هو 27 من 2026 فيهم قاصرين.

نقابات الشرطة والحرس المدني كطالب بتعديل القانون باش يشمل حالات الدخول عومان، غير هو هاد الإصلاح صعيب يتحقق بسبب الوضع السياسي الحالي والعطلة الصيفية.