خرج الموقع الرسمي “الما ديالنا” التابع لوزارة التجهيز والماء، بمعطيات جديدة كتبشر المغاربة باللي محطة تحلية مياه البحر الكبيرة فكازا غادية تدخل الخدمة فشهر فبراير 2027، وهادشي فإطار المشاريع الكبرى اللي خدام عليها المغرب باش يقوي الأمن المائي ويضمن التزويد بالماء الصالح للشرب فالمملكة. هاد المعطيات الرسمية ديال الوزارة زادت كشفت باللي أشغال مشروع “الطريق السيار للماء”، اللي غادي يربط بين حوض أبي رقراق وحوض أم الربيع، غادي تبدا مع نهاية هاد سنة 2026.

والهدف من هاذ المشاريع باين وهو يسهلو نقل الما بين الأحواض المائية على حساب الحاجة، ويقويو تدبير الموارد المائية وطنيا خصوصا فظل التحديات اللي فرضها الجفاف.

هادشي كلو مزيان وإيجابي وفمصلحة البلاد وخصوصا أن المشروع بدا ف 2021، وكيدخل فإطار الاستراتيجية المائية ديال المملكة اللي كتهدف توصل لتغطية 100% من حاجيات المواطنين من الما الصالح للشرب، وتوفير حوالي 80% من حاجيات السقي فالسنوات الجاية، تزامنا مع إكمال 14 سد قيد الإنجاز و8 سدود أخرى دخلات مرحلة الاستغلال، بلا ما ننساو التساقطات المطرية المهمة ديال هاد سنة 2026 اللي أمنات الما لعامين لفوق.

ولكن، اللي كيطرح كثر من علامة استفهام ف هاد التوقيت بالذات، هو واش هاد الخرجة الإعلامية والتبجح بهاد الأرقام والمشاريع دابا مجرد تواصل عادي ديال وزارة التجهيز وحق للمواطن فالمعلومة؟ أولا السي نزار بركة لقاها سبة وبغا يستغل هاد المشاريع فحملة انتخابية استباقية ومبطنة مع قرب الاستحقاقات ديال 2026؟

زعما علاش هاد الترويج لهاد المخططات دابا ومشاريع محطة تحلية الما فكازا ماشي حاجة جديدة تولدات اليوم؟ راه كاع المغاربة عارفين باللي هاد المشروع بادي فالمساطر والدراسات ديالو هادي سنين من نهاية 2021، وغادي وفق جدولة زمنية وتقنية محددة.

ربما حزب الاستقلال باغي يربح نقط سياسية على “فوبيا الجفاف”، ومعروف على أن لسانهم كيتكلم بدون تطبيق، ولكن كيبقى تدبير المياه والتأمين ديالها قضية كتهم مشاريع الدولة الكبيرة ومايمكنش تسيس وتستغل فأي إطار حزبي.