علنت المندوبية السامية للتخطيط على إطلاق طلب عروض دولي مفتوح لإنجاز منصة رقمية جديدة موجهة للمرتفقين، غادي تكون مخصصة لنشر وتدبير وتثمين المعطيات الإحصائية والمنشورات الرسمية، بغلاف مالي كيقارب 5 ملايين درهم.

وكيهم هاد المشروع تطوير منصة رقمية متكاملة، غادي تشمل تصميمها وتطويرها وتأمينها وربطها بقاعدة البيانات الإحصائية، إضافة لترحيل المعطيات، وإطلاق المنصة، وتكوين الأطر، وصيانتها في فترة الضمان.

وحسب وثائق طلب العروض، فالمندوبية حددات يوم 22 شتنبر 2026 لفتح الأظرفة، بينما وصل مبلغ الضمان المؤقت لـ95 ألف درهم، مع إلزام الشركات المتنافسة بإيداع ملفات ديالها إلكترونياً عبر بوابة الصفقات العمومية.

وحسب نفس البلاغ، أكدات المندوبية على أن هاد المشروع كيدخل ضمن خارطة الطريق الاستراتيجية 2025-2030، بعدما ولى الموقع الحالي ما كيسايرش التطور الرقمي والطلب المتزايد على البيانات القابلة للاستعمال وإعادة الاستعمال، إضافة إلى محدودية محرك البحث وضعف الربط مع قاعدة البيانات المركزية.

وغا يتدار المشروع على ثلاث مراحل تمتد لـ19 شهر، المرحلة الأولى، اللي غادي تدوم 8 أشهر، غادي تعرف إطلاق نسخة أولية فيها مصدر موحد للبيانات، ومحرك بحث دلالي، وواجهة متعددة اللغات.

أما المرحلة الثانية، لي المدة ديالها 5 أشهر، فغادي تركز على تطوير أدوات تفاعلية لاستكشاف وتحليل البيانات.

وفالمرحلة الثالثة، اللي غادي تمتد لـ6 أشهر، غادي يتم إدماج تقنيات الذكاء الاصطناعي، وتعزيز الأمن السيبراني، وتقوية حكامة المنصة، مع نقل الخبرة التقنية لأطر المندوبية قبل الاستلام النهائي للمشروع.

وزادت اشترطات المندوبية، على الشركة اللي غادي تربح الصفقة تسليمها الملكية الكاملة لجميع البرمجيات والتطويرات المنجزة، بما فيها الشيفرة المصدرية والوثائق التقنية، باش تبقى مستقلة تكنولوجياً وما تبقاش مرتبطة بأي مزود مستقبلاً.

ومن الناحية المالية، غادي يتم أداء قيمة الصفقة على ثلاث دفعات، كل دفعة مرتبطة باستكمال مرحلة من مراحل المشروع، قبل فترة الضمان والاستلام النهائي للمنصة.