بينات مختلف الأحزاب السياسية، بلي مقادراش تنخرط ف تخليق العمل السياسي كيف دعا سيدنا ف رسالة موجهة للبرلمان، ها الرسالة فهموها بعض الاحزاب بالعكس، منهم اللي مخلي سياسيين عليهم شبهات وعندهم ملفات قضائية ورشحهم للانتخابات البرلمانية والبعض كيمجد فيهم كيف دار محمد اوزين، زعيم الحركيين فهاد الويكاند بالفقيه بنصالح.

الرسالة ديال الملك لتخليق الحياة السياسية والبرلمانية الموجهة إلى البرلمان في يناير 2024، كانت كتهدف إلى إقرار مدونة للأخلاقيات ملزمة قانونياً، تعزيز النزاهة والشفافية، وترسيخ الثقة في المؤسسات المنتخبة

فالوقت للي كولشي كيتسنا مواقف حازمة وواضحة من الأحزاب السياسية ضد الفساد ونهب المال العام وتفعل رسالة سيدنا، خرج علينا محمد أوزين، الأمين العام لحزب الحركة الشعبية، بـ “تصريح غريب” فـ قلب مدينة الفقيه بن صالح، كيمجد فيه “نضال” و”تضحيات” القيادي الحركي والوزير السابق محمد مبديع فهاد المدينة للي مبغاتش تخرج من الارتجالية ف التدبير وتطور.

اوزين فهاد تصريح عطا مساج خايب للناس للي كتأمن بالمشاركة فالسياسية، وف تحدي لحكم قضائي ثقيل صدر فـ حق مبديع بـ 13 سنة سجناً نافذاً وغرامة 30 مليون درهم فـ جرائم ثقيلة كايتعلق الأمر فيها بـ: تبديد أموال عمومية، الارتشاء، استغلال النفوذ، والتزوير فـ وثائق رسمية. فاش اوزين وصف مبدع بالمناضل.

بذلك تحول المفهوم ديال “النضال” عند بعض الزعامات السياسية لفزاعة كايغطيو بيها على خروقات المقربين منهوم. فاش خرج أوزين وكيقول بلي مبديع “أعطى الكثير للمدينة وللحزب”، من حق المتابعين للشأن السياسي يتساءلو بكل عفوية: واش النضال هو تبديد أموال الساكنة للي هي اموال الجماعة ؟ واش الدفاع على حقوق المواطنين هو الارتشاء وتزوير الأوراق الرسمية اللي أثبتها القضاء؟.

رغم أن أوزين حاول فـ كلامو يغطي الشمس بالغربال بعبارة “حنا ما كندخلوش فـ القضاء” إلا أن هاد الدفاع ديالو المستميت وتلميحه بلي الفقيه بنصالح “تراجعت من بعد مبديع”، راها محاولة مفضوحة لتبييض صفحة محكوم قضائياً بجرائم أموال.
كيفاش اسياسي كايطالب فـ البرلمان والإعلام بـ “تخليق العملية السياسية” و”ربط المسؤولية بالمحاسبة”، ومحاربة الفراقشية (وكاع للي قال عليهم راه زوين ومعقول)، ولكن سي اوزين فـ أول اختبار فالتيران ديال السياسة والانتخابات فضل ينتصر لمبدع من أجل عيون الأصوات والناس للي كيدعموه ف منطقة الفقيه بنصالح.