طريق ماشي كيف الطرقان...علاش المغرب سمَّا طريق تزينت الداخلة بسمية الرايس 47 د مريكان .

مصدر الصورة

كود – تحليل//

’’كل كاميو، كل طاكسي، كل فواياجور غادي يدوز من هاد الطريق غادي يشوف اسم ترامب مكتوب فقلب الصحراء المغربية، هادي رسالة يومية، كتعاود، ماشي غير خطاب دبلوماسي فمؤتمر صحفي كيتنسى مورا سيمانة‘‘

كتب الرئيس الأمريكي دونالد ترامب على حسابو فـ”تروث سوشال” كلمة شكر موجهة للملك محمد السادس، بعدما تقرر تسمية الطريق السريع الرابط بين تيزنيت والداخلة باسمو، هاد الميساج وخا كيبان بسيط وبروتوكولي، ولكن فالحقيقة فيه رسائل سياسية متداخلة، خاصنا نفكوها وحدة وحدة.

باش نفهموا علاش هاد التسمية عندها وزن، خاصنا نرجعو للطريق نفسو، تيزنيت-الداخلة ماشي لي كيمتد على 1055 كيلومتر، بغلاف مالي كيفوت 9 مليار درهم، وكيضم أطول جسر طرقي فتاريخ المغرب فوق واد الساقية الحمراء، هو الشريان المركزي للنموذج التنموي الجديد للأقاليم الجنوبية اللي دشنو الملك محمد السادس بمناسبة الذكرى الأربعين للمسيرة الخضراء ف 2015، بمعنى آخر، هادا ماشي طريق كيف الطرقان، ولكن المشروع الأكثر رمزية فالسياسة المغربية تجاه الصحرا، لأنو كيربط شمال المملكة بجنوبها بشكل مادي وملموس، وكيسهل التنمية والاستثمار فمنطقة كانت لعقود بعيدة على مركز القرار الاقتصادي.

اختيار هاد الطريق بالذات باش ياخد اسم ترامب هو قرار مدروس، الرباط عارفة مزيان أش كتدير مني اختارت توجه رسالة تكريس الاعتراف الأمريكي بمغربية الصحراء، حيث واشنطن كانت أول قوة كبرى فالعالم اعترفات رسميا بالسيادة المغربية على الصحرا، وهاد الاعتراف لي جا فدجنبر 2020 خلا المغرب من ديك الساعات كيخدم بشكل مستمر باش يحول هاد الاعتراف من إعلان سياسي لواقع مؤسساتي وملموس، تسمية الطريق باسم الرئيس اللي وقع هاد الاعتراف هو بالضبط هاد النوع من الترسيخ، حيث كل كاميو، كل طاكسي، كل مسافر غادي يدوز من هاد الطريق غادي يشوف اسم ترامب مكتوب فقلب الصحراء المغربية، هادي رسالة يومية، مادية، كتعاود، ماشي غير خطاب دبلوماسي فمؤتمر صحفي كيتنسى بعد سيمانة.

بالنسبة لخصوم الوحدة الترابية المغربية، هاد النوع من الإشارات صعيب بزاف يتجاوبو معاه، حيث بيان دبلوماسي ممكن يتفند ولا يتناقش فمجلس الأمن، ولكن قنطرة بطول 1648 متر وطريق بطول 1055 كيلومتر ماغاديش تهدم، حيث هدا “أمر واقع” اضافي فوق الأمر الواقع الميداني لي كاين من عقود.