الكنيست الإسرائيلية دارت قانون كيعترف بمجهود وفضل المغاربة اليهود فتأسيس وبناء إسرائيل واختارت باش تحتفل بالثراث اليهودي المغربي نهار 10 يناير اللي كيوافق نفس التاريخ من عام 1961، فين تجمعو 44 يهودي فلبلاج د الحسيمة، واللي جاو كاملين من كازا هازين معهم غير حوايجهم وماكلتهم بتعليمات من “الموساد‘‘.

ومني قربات واحد السفينة من الحسيمة سميتها “إيغوز”، لي معنيتها الحوت بالعبرية، واللي كانت دارت من قبل رحلات سرّية باش يخرّجو اليهود من المغرب لإسرائيل قبل ما تعطب وتصلح، وخا هكاك بقا مشكوك فيها ولكن ما كان حتى حل آخر عند لي منظمين الرحلة 8، السفينة ركبو فيها رجال وعيالات ودراري، والرحلة سالات بكارثة مني غرقت السفينة بلي فيها مورا ساعتين وسط البحر.

مقارنة مع دول اخرى، محمد الخامس كان موقفو إيجابي من اليهود المغاربة، الشي لي خلا يوصل لإسرائيل 72 ألف يهودي مغربي ما بين 1948 و1955، وفنفس الوقت بقات جالية يهودية كبيرة فالمغرب، قريبة لـ200 ألف واحد.

فـ1956، تعرض المغرب لضغوط من دول بحال مصر باش توقف هجرة اليهود، بحجة أن أي يهودي كيمشي ممكن يولي جزء من الجيش ديال إسرائيل، فداك السياق ديال القومية العربية، ما كانش التعامل مع هاد الضغط ساهل، وخا هكاك الهجرة السرّية بقات خدامة والمخزن كان داير عين ميكة.

ف 1961، كان كثر من 30 ألف يهودي خرجو من المغرب بالبحر، حتى غرقات “إيغوز” لي بدلات بزاف ديال الأمور، وخلاّت يتعاود يتنظم هاد الملف، خصوصا مع الضغط اللي جا من فرنسا ومريكان، تما بان اتفاق بين الرباط وزعماء الطائفة اليهودية، باش ليهود المغاربة يمشيو لأي بلاد يشكل رسمي، غير ما يكونش غاديين نيشان لإسرائيل.

ومن بعد دارت عملية تسمّات “يوشين”، واللي خرج فيها تقريبا 80 ألف يهودي مغربي لإسرائيل ولكن من دول أخرى بحال فرنسا وجبل طارق، أما جتت الناس لي غرقو فإيغوز دفنو فالقدس ومزال الناس كيترحمو عليهم حتى لدابا.