الجمعية المغربية لحقوق الإنسان دخلات على خط وفاة عبد الرحيم فقير فإيطاليا وكتطالب بتحقيق جدي ومعقول بدعم من القنوات الدبلوماسية .

منذ

كود -كازا //

عبّرات الجمعية المغربية لحقوق الإنسان على الاستنكار ديالها الكبير مورا موت المواطن المغربي عبد الرحيم فقير، اللي كان عندو 43 عام، بمدينة بولونيا الإيطالية، بعدما دخلو البوليس بطريقة وحشية باش يشدوه، حسب الفيديوهات اللي تداولوها الناس ووسائل الإعلام.

وقالت الجمعية فبلاغ رسمي، بلي هاد الواقعة كتشكل انتهاك خطير للحق فالحياة، واعتبرات أن اللي وقع هو مساس بحقوق الإنسان الأساسية اللي كتحميها المواثيق والاتفاقيات الدولية.

كيف ما عزا المكتب المركزي عائلة الفقيد، وأكد تضامنو الكامل معاها، وطالب بفتح تحقيق معمق ونزيه باش يتحددو المسؤولين على الوفاة ويتحاسبو.

كما دانت الجمعية الطريقة اللي تعامل بها البوليس مع الضحية، وطالبت السلطات القضائية الإيطالية بمدينة بولونيا بتوسيع التحقيق الجاري، وما يقتصرش غير على تهمة “القتل غير العمد”، مع التحقيق حتى فدور عناصر الإسعاف اللي كانو حاضرين بلا ما يتدخلو باش يعتقو الضحية.

ودعات الجمعية وزارة الشؤون الخارجية والتعاون الإفريقي والمغاربة المقيمين بالخارج لتدخل من القنوات الدبلوماسية لمواكبة عائلة عبد الرحيم فقير، وضمان حقوقها باش مايفلت حتى مسؤول من المحاسبة.

كما ناشدت الهيئات الحقوقية بإيطاليا باش تبع الملف قضائياً حتى تحقق العدالة.

وفاخر البلاغ، عبّرات الجمعية على قلقها من كثرة الممارسات التمييزية والعنف البوليسي ضد المهاجرين فإيطاليا وعدد من دول الغربة، واعتبرت أن تصاعد الخطاب العنصري والتساهل مع بعض التجاوزات الأمنية كيساهم فاستمرار هاد الظواهر.

مصدر الصورة