موت مغربي فإيطاليا وهو شادينو البوليس نوض روينة ..و عضو اللجنة المركزية للهجرة واللجوء لـ”كود”: خطاب الكراهية اللي كيغذيه اليمين المتطرف كيهدد المهاجرين وكنطالبو القضاء الإيطالي يكون مستقل فهاد لملف ويبين الحقيقة كاملة .

مصدر الصورة

أميمة عطية – كود كازا ///

تسبب موت المواطن المغربي عبد الرحيم فقير بمدينة بولونيا الإيطالية فضجة كبيرة فإيطاليا، بعدما وثق فيديو ليه اللحظات الأخيرة من تدخل لبوليس لتوقيفو وهو كيطلب المساعدة وكيقول إنه ما قادرش يتنفس ، قبل ما يفقد الوعي ديالو ويموت .

هاد القضية لي فجرت موجة تضامن واسعة، وخرجات بسببها وقفات احتجاجية، لبارح الاتنين 20 يوليوز فشوارع إيطاليا و دخلات فيها هيئات حقوقية وأحزاب ونقابات على الخط، مطالبة بفتح تحقيق شفاف باش تكشف جميع ظروف هاد لموت واتحددو المسؤوليات.

وفهاد السياق، أكد حكيم سيكوك، رئيس فرع الجمعية المغربية لحقوق الإنسان بالرباط وعضو اللجنة المركزية للهجرة واللجوء، في تصريح خاص لـ”كود”، أن الجمعية ديالهم تابعت بقلق كبير وفاة المواطن المغربي عبد الرحيم فقير فاش تدخلو لبوليس الإيطالي ووقفوه، بعدما تبتوه فالأرض، في مشهد وصفو بالصادم، بحيت أنه كان كيطلب لمساعدة وهو مقادرش اتنفس.

وزاد ضاف سيكوك فهاد الإطار ، أن طريقة التوقيف، وفق المعطيات المتوفرة، كتثير أسئلة جدية حول مدى احترام مبدأ التناسب في استعمال القوة، معتبراً أن مهمة لبوليس هي حماية الأرواح وماشي تعريضها للخطر، وأن تحديد المسؤوليات كيبقى بيد القضاء بعد استكمال التحقيقات.

واعتبر رئيس فرع الجمعية المغربية لحقوق الإنسان بالرباط ،أن هاد الواقعة خاصها تتفهم فالسياق الأوروبي الحالي، اللي كيعرف، حسب تعبيرو، تصاعد فخطابات الكراهية والعنصرية والتحريض ضد المهاجرين، واللي كيغذيها اليمين المتطرف، مضيفاً أن هاد الخطابات كتساهم فخلق مناخ سياسي واجتماعي كيجرد المهاجرين من إنسانيتهم، وكيخليهم أكثر عرضة للتمييز والعنف، وتقدر تشكل، حسب تعبيرو فبعض الحالات، حتا غطاء كيحمي تجاوزات اقدرو يرتكبوها بعض رجال الشرطة.

وفالأخير ، ختم سيكوك تصريحو لـ”كود” بالتأكيد على أن لجمعية كيتسناو نتائج التحقيق لي بداه القضاء الإيطالي، وعندو أمل باش يتعامل القضاء مع الملف باستقلالية كاملة، ويكشف الحقيقة وترتيب المسؤوليات القانونية فحالة إلا ثبت وقوع أي تجاوز.

وللإشارة فقط ، وحسب ما نشرات ” كود” ، علقات رئيسة الوزراء الإيطالية، جورجيا ميلوني، على قضية وفاة المواطن المغربي عبد الرحيم فقير، اللي مات فعملية توقيف من طرف الشرطة بمدينة بولونيا، وأكدات أن السلطات خاصها تبين جميع تفاصيل الحادث وتحدد المسؤوليات.

وكالت ميلوني، فتصريح نشراتو فحسابها، اللي وقع فبولونيا “مامقبولش والحقيقة خاصها تخرج كاملة، بلا أحكام مسبقة وبلا تساهل مع أي طرف، باش نعرفو شكون كيتحمل المسؤولية‘‘.

وفنفس الوقت، هضرات رئيسة الحكومة الإيطالية على أن الاحتجاج والمطالبة بالحقيقة ما كيعنيش الاعتداء على البوليس، بعدما ترونات بين المحتجين والأمن.

وما زالت النيابة العامة الإيطالية كتواصل تحقيقاتها فالقضية، باش تبين جميع ظروف وملابسات موت عبد الرحيم فقير، وسط مطالب حقوقية وشعبية بإجراء تحقيق شفاف ومستقل كيحدد المسؤوليات.

تقارير إعلامية طاليانية قالت بلي الحصيلة الأولية للروينة اللي وقعات البارح، هي 11 لمتضاهر تضربو وتهزو نيشان ليرجونص.

أما الفرق الطبية اللي كانت حاضرة، سعفات 4 المتظاهرين و5 البوليس كيفما تهز بوليسي للمستعجلات.

من جهتو، علن بوليس بولونيا أن الاحتجاجات خلات إصابة 64 عنصر أمن، واللي خاصهم بين 3يام و35 يوم باش يبراو، كما تهرسات 6 طموبيلات ديال البوليس، عاد خسائر فشوارع ومساحات المدينة.