في سويسرا فاش كتقدم لشي خدمة أو تبغي تكري غير شي برتوش، كيطلبوا منك السجل العدلي باش يشوفوك واش عندك سوابق، وشهادة الملائمة المالية باش يشوفوك واش سبقليك درتي شي تصرف هرگاوي ومخلصتيش الغرامة او تسلفتي شي حاجة ومارديتيهاش، او الدولة كتسالك شي حاجة ونتا داير راسك ممسوقش، وبلا هاد الشهادة المجتمع والدولة ميتيقوش فيك أنك مؤهل تخدم وتكري وتدير حياة ونتا الدولة باقا كتسالك، مثلا فايت حصلوك سالت في التران كيعطيوك غرامة ماعندكش باش تخلصها كيطلقوك تعيش، ولكن راه ماغادي الدولة توقف معاك في والو حتى تخلص الغرامة لي عليك، طبعا هادشي كيخلي الإنسان إلى غرق في دوامة الفقر صعيب يخرج منها، ولكن عموما كيخليه يفكر مية مرة قبل مايسلت في التران او يدير أي مخالفة لأن الدولة عندهم مكتنساش ومكتحنلش هرگاوة او كتعاطف معاهم.

هنا في المغرب سايبة الوقت يمكن ليك تخرى وسط الطريق ومكاين لي يهدر معاك، عادي راجل بعقلو في طوموبيل مزيانة يوقفها جنب الطريق وينزل يبول وهادشي وسط المدينة ماشي في الخلى راه هانية، الطاكسيات راه كيبول في قرعة وسط الطوموبيل ويلوحها وبنفس اليد يرد عليك الصرف، السياقة خصوصا في المدن الكبرى جحيم يومي، واحترام القانون كيولي استثناء، كازا دايرين قوانين خاصة، بعض السطوپات لي جنب الترامواي كتوقف في الضو حمر، كتلقى طاكسي كيكلاكسوني عليك باش تحرق الضو وتزيد، أما الماطر دايرين فوضى حقيقية راه كيعيشها أي مغربي واخا مايكونش جزء منها راه مأثر بها واخا غير بالصوت، الطبيعة والبحورة والجرادي والمنتزهات والزبل والتخريب فين مامشيتي، والتهرگاويت طاغية على جميع الطبقات الاجتماعية للأسف، وطبعا هادشي راه الدولة وتساهلها هو السبب الأول فيه.

باش الدولة تحارب هرگاوة راه ممحتاجاش شي علم مكاينش، لأن هادشي داروه أوروبا هادي قرون ودول آسيوية هادي عشرات السنين، يكفي تشوف النماذج الناجحة وتدرسها وتدير بحالها، وبلاش أوروبا تشوف دول آسيوية كانت مستعمرة حتى هي وفقيرة وجيعانة وتحضرات وتنقات وتمدنات بحال كوريا وماليزيا وسينغافورة، الأمر ساهل هو القانون والغرامات وتطبيقها وآلية فعالة لتحصيلها، وهابنادم غادي يولي مربي، راه أوروبا معندهمش جينات ديال احترام القانون راه كانوا زعماء هرگاوة في العالم، كيحرقوا المرأة غير إلى كان شعرها حمر، كيديرو حروب بين دول غير على اختلاف في تفسير قصة في الكتاب المقدس، ومع المدة والتقدم راه ولاو رمز الحضارة في العالم، وهادشي بفضل القانون وتطبيقو، والدولة عندها گاع الإمكانيات باش تدير هادشي إذن شنو كتسنى، الكاسك هو اللخر ماقادراش تفرضو على صحاب الماطر.