شكون المتآمر والخائن واش اللي مهرب فلوسو للبرتغال واوربا ولا لعابة المنتخب اللي مستثمرين فبلادهم ومسوقينها عالميا. راه بفضلهم تحويلات مغاربة العالم دازت من 97 مليار درهم ف21 ل ل122 مليار ردهم ف25. سياسي ل"كود": اللي داروه اللعابة فربط مغاربة العالم ببلادهم ما قدرات لا حكومة لا مؤسسات ديرو  .

سعيد الشاوي كود كازا ///

اللي ناض كيتاهم الاسود بالخيانة والتآمر وبغى يلصقها فحرية التعبير راه كيخربق. هادي كيعاقب عليها القانون الجنائي كاع. القانون الجنائي كيعرفو باللي هو “تصميم على العمل متى كان متفقاً عليه أو مقرراً بين شخصين أو أكثر”. عقوبتها كتختالف حسب خطورة الهدف والمؤسسات المستهدفة من هذا الاتفاق. نعت المنتخب تلميحا او تصريحا راه عقوبتو مشددة.

لكن شكون المتآمر؟ واش اللي كيدعم بلادو بالاستثمارات لكبيرة وكعطيها اشعاع دولي بحال حكيمي ودياز ومزراوي والصيباري ولخنوس وديوب وشادي والطالبي…. ولا هادوك اللي كيهربو فلوس جابوها بالتسمسير للبرتغال ولدول اوربية بلا ما يكون عندهم حتى ارتباط بهاد الدول. ما تزوجو ببرتغالية ما عاشو فيها ما والو.

الخدمة اللي داروها لمغاربة ديال الكورة للدولة المغربية راها شي حاجة كبيرة بزاف. سياسي قال ل”كود” باللي تقريبا كاع السياسات العمومية لمغاربة العالم اللي دارتها الحكومة وغيرها فشلات فاهدافها. وباللي اللي خلى مغاربة العالم ترتابط ببلادها بقوة هو المنتخب المغربي لكرة القدم.

صحيح باش تأهل المنتخب للدومي فينال فمونديال قطر وقع تحول كبير بين جيل جديد من مغاربة العالم وبين المغرب. اللي دارو واحد بحال حكيمي ومعاه لعابة كثار راه عمل عظيم.

مصدر الصورة

هاد العمل العظيم كيبان فتحويلات مغاربة العالم. نبداو ب2021 كانت 93.7 مليار درهم. بقات طالعة سنة بعد سنة ووصلات ف2025 ل122 مليار درهم. كل سنة فهاد السنوات كان ارتفاع فالتحويلات. حسب بيان مكتب الصرف راه تحويلات المغاربة المقيمين بالخارج وصلات حتى 31 ماي 2026 ل 50,22 مليار درهم عند متم ماي 2026. اي هاد 2026 غادي تكون التحويلات كثر من 2025 لانو ايلى قارننا نفس الفترة (من يناير حتى 31 ماي 2025 كانت التحويلات هي 46,16 مليار درهم اي كاينة زيادة بنسبة 8,8 في المائة
هاد الشي راه ساهم بيه بشكل كبير ابطال وصلو المغرب لربع نهاية كأس العالم فميريكان 2026 ونصف نهاية كأس العالم بقطر 2022 .بيان المكتب المديري للجامعة الملكية المغربية لكرة القدم اللي اكدات فيه على ضرورة التصدي لهادوك اللي كيتاهمو الاسود بالتآمر والخيانة راه فمحلو. خاص تطبيق القانون.

من حق كل مغربي يطالب بابعاد اي لعاب او اي مسؤول ويتاقدو غير ماشي من حقو يتاهمو بالتخوين والتآمر.

راه كون هاد الشي تقال فدول اوربية كان غادي يمشي للقضاء وينوضو كلشي يهاجمو مروجيه. ما نهدروش كون هادو ناضو داروها فمصر او فشي دولة عربية او افريقية.