لمالين "الصباح" لملايري اللبناني مولوي ومول كارفور بناني. راه اتهام لعابة الاسود او الجامعة او الجهات المسؤولة ب"الخيانة" و"التآمر" ماشي حرية تعبير ومحاولتكم ترجعوها قضية رأي اهانة للشعب وافتتاحياتكم تمويه للقضية الاساس :الاتهام بالخيانة .

مصدر الصورة

كود سعيد الشاوي ///

عوض ما يمشي مالين جريدة “الصباح” اللبناني مولوي ومول كارفور زهير بناني عند النيابة العامة ويقدمو ليهم “المعطيات الحصرية” اللي جمعوها وبناو عليها افتتاحية جريدتهم “المؤامرة”، بداو يخرجو ويدخلو فالهدرة.

رجعات جريدتهم كدير افتتاحيات كلها تمويل ودخول وخروج فالهدرة. راه القضية يا ملايرية، ما عندها علاقة بحرية التعبير. ما عندها علاقة بحرية الصحافة. ما عندها علاقة بحقوق الانسان والحيوان. راه افتتاحيتكم فيها اتهام بالخيانة والتآمر تصريحا وتلميحا ضد لعابة المنتخب والجامعة والمؤسسات الوصية. هاد الشي بلا ما يكون عندكم دليل واحد. يعني هاد الشي ماشي غير تشهير وصافي. راه كثر من التشهير. تهم جنائية هادي.

يعني انو قبل ما تكتبو هاد الافتتاحية جمعتو معطيات كثيرة باش توصلو لهاد النتيجة. دازت ايام وما نشرتو والو من اللي من المفروض يكون عندكم. بل رجعتو كتزايدو ودخلو وتخرجو فالهدرة.

حرية التعبير خليوها عليكم فالتيقار. باش تكتبو باللي الحارس بونو هو الوطني الوحيد راه اتهام لكاع اللعابة “غير وطنيين”. راكم ما عطيتوش تفسير علمي منطقي لهزيمة. ركبتو على نظرية المؤامرة لتفسير خسارة فماتش ديال الفوت. هاد الشي باش يكون فجريدة عندها مسؤولية اخلاقية وكتحمل المسؤولية القانونية ايلى قصرات كيف درتو، خاص تكون المحاسبة.

دابا النيابة العامة خاصها تجيبكم بجوج وللي دار سميتو باش باش تعتاقلكم. اللا. باش تقدمو ليها المعطيات اللي جمعتوها باش تتاهمو منتخب بلعابتو وجامعتو ومؤسساتو بالخيانة والتآمر. هاد جوج عبارات جات فافتتاحية اللي هي المعبرة عن توجه الجريدة.

الاصرار على تشتيت الانتباه على “المؤامرة” راه نوع من المؤامرة. القضية الاولى والوحيدة ماشي رأي. ماشي تعبير. ماشي حرية تعبير. اللا. بل اتهامات خطيرة بلا اساس فافتتاحية كتعبر على رأي “الصباح”